വൈപ്പിൻ: ഇൻഷ്വറൻസ് പോർട്ടൽ ഓഫീസിലെത്തിയ അജ്ഞാതൻ ജീവനക്കാരിയെ കബളിപ്പിച്ച് 5,500 രൂപ കവർന്നു. ഓച്ചന്തുരുത്ത് കന്പനിപ്പടി ബസ് സ്റ്റോപ്പിനു തെക്കുഭാഗത്തുള്ള യുണൈറ്റഡ് ഇന്ത്യാ ഇൻഷ്വറൻസിന്‍റെ പോർട്ടൽ ഓഫീസിൽനിന്നാണ് കഴിഞ്ഞ ദിവസം പണം കബളിപ്പിച്ചത്. ഉച്ചയ്ക്ക് 12.40 ഓടെ ഈ ഓഫീസ് നടത്തുന്ന മിൽട്ടൺ എന്നയാളെ അന്വേഷിച്ചെത്തിയ 45 വയസ് പ്രായമുള്ളയാളാ ണു കബളിപ്പിക്കൽ നടത്തിയത്്.
മിൽട്ടൺ ഓഫീസിലില്ലാതിരുന്ന സമയത്ത് ബൈക്കിലെത്തിയ ഇയാൾ ജീവനക്കാരിയോട് മിൽട്ടന്‍റെ ഫോൺ നന്പർ വാങ്ങി അവരുടെ മുന്നിൽ വച്ചുതന്നെ മിൽട്ടണെ വിളിക്കുന്നതായി അഭിനയിക്കുകയും ഓഫീസിലെ ജീവനക്കാരിയിൽനിന്ന് പണം വാങ്ങിക്കോട്ടെ എന്നു ചോദിക്കുകയുമായിരുന്നു. ഇതു ശരിയാണെന്നു തെറ്റിദ്ധരിച്ച ഓഫീസ് ജീവനക്കാരി പണം നൽകുകയും ചെയ്തു.
പിന്നീട് മിൽട്ടൺ സ്ഥലത്തെത്തിയപ്പോഴാണ് അജ്ഞാതൻ കബളിപ്പിച്ചതായി മനസിലായത്. സമീപത്തെ സിസിടിവി കാമറകളിൽ ആളുടെ ദൃശ്യവും വാഹനവും പതിഞ്ഞിട്ടുണ്ടെങ്കിലും അവ്യക്തമാണ്. ഞാറക്കൽ പോലീസിൽ പരാതി നൽകിയിട്ടുണ്ട്.
