തിരുവനന്തപുരം: ആണ്‍വേഷം ധരിച്ചെത്തി അമ്മായിയമ്മയുടെ കാല്‍തല്ലിയൊടിച്ച യുവതി പിടിയില്‍. തിരുവനന്തപുരം ബാലരാമപുരം ആറാലുംമൂട് തലയില്‍ പുന്നക്കണ്ടത്തില്‍ വാസന്തിക്കാണ് പരിക്കേറ്റത്.
സംഭവത്തില്‍ വാസന്തിയുടെ മകന്‍റെ ഭാര്യ സുകന്യ(27)യെ പോലീസ് അറസ്റ്റ് ചെയ്തു. വീടിന് സമീപത്തെ സൊസൈറ്റിയില്‍ പാല്‍ നല്‍കാന്‍ പോകുമ്പോള്‍ ആണ്‍വേഷം ധരിച്ച് മുഖംമറച്ച് എത്തിയയാള്‍ വാസന്തിയെ ആക്രമിക്കുകയായിരുന്നു.
കമ്പിപ്പാര ഉപയോഗിച്ചുള്ള ആക്രമണത്തില്‍ വാസന്തിയുടെ കാല്‍ ഒടിഞ്ഞു. വാസന്തിയുടെ കരച്ചില്‍കേട്ട് നാട്ടുകാര്‍ എത്തിയപ്പോഴേക്കും ആക്രമി രക്ഷപെട്ടിരുന്നു.
തുടര്‍ന്ന് വാസന്തിയെ നാട്ടുകാര്‍ ആശുപത്രിയില്‍ പ്രവേശിപ്പിച്ചു. പോലീസ് നടത്തിയ അന്വേഷണത്തിലാണ് സുകന്യയെ അറസ്റ്റ് ചെയ്തത്.
ഭര്‍ത്താവ് സുകന്യയെ നിരന്തരം ഉപദ്രവിക്കുമായിരുന്നു. വാസന്തികാരണമാണ് ഭര്‍ത്താവ് തന്നെ മര്‍ദിക്കുന്നതെന്ന തോന്നലിലാണ് സുകന്യ ആക്രമണം നടത്തിയത്.
ഭര്‍ത്താവിന്‍റെ ജീന്‍സ് പാന്‍റും ഷര്‍ട്ടും ധരിച്ചാണ് സുകന്യ ആക്രമണം നടത്താനെത്തിയത്. പോലീസ് അന്വേഷണത്തിനിടെ ആക്രമണത്തിന് ഉപയോഗിച്ച കമ്പിപ്പാര കണ്ടെത്തിയിരുന്നു. ആക്രമണസമയം പ്രതി ധരിച്ച വസ്ത്രവും സുകന്യയുടെ വീട്ടിൽ നിന്നും കണ്ടെത്തിയിരുന്നു.
തുടര്‍ന്നാണ് അന്വേഷണം സുകന്യയിലേക്ക് എത്തിയത്. ചോദ്യം ചെയ്യലിനിടെ പ്രതി കുറ്റം സമ്മതിക്കുകയായിരുന്നു.
