ആലപ്പുഴ: നാദിർഷ സംവിധാനം ചെയ്ത ഈശോ, കേശു ഈ വീടിന്‍റെ ഐശ്വര്യം എന്നീ പേരുകളുള്ള സിനിമകൾ ക്രൈസ്തവരെ അവഹേളിക്കുന്നതാണെന്ന് ബിഡിജെഎസ് സംസ്ഥാന അധ്യക്ഷൻ തുഷാർ വെള്ളാപ്പള്ളി.
ഇതു നിരോധിക്കാൻ സർക്കാർ തയാറാകണമെന്ന് തുഷാർ വെള്ളാപ്പള്ളി പ്രസ്താവനയിൽ ആവശ്യപ്പെട്ടു.ഇത്തരം പ്രവണതകൾ ചെറുത്തു തോല്പിക്കേണ്ടത് സമൂഹത്തിന്‍റെ ആവശ്യകതയാണ്.
ക്രൈസ്തവരെ അവഹേളിക്കാനുള്ള ശ്രമങ്ങളുടെ തുടർച്ചയാണ് നാമകരണമെന്ന് സംശയിക്കുന്നു. ഇത്തരം നീക്കം സമൂഹത്തിൽ ഭിന്നതയും വിഭജനവും ഉണ്ടാക്കാനേ ഉപകരിക്കൂ.
ആവിഷ്കാര സ്വാതന്ത്ര്യം എന്ന പേരിൽ മതവികാരം വ്രണപ്പെടുത്തുന്ന നീക്കങ്ങൾ ചെറുക്കാൻ ബിഡിജെഎസ് മുൻപന്തിയിലുണ്ടെന്നും തുഷാർ പറഞ്ഞു.
വിശ്വാസികളെ അവഹേളിക്കുന്ന ചിത്രങ്ങൾക്ക് എതിരേയും ലൗ ജിഹാദ് പോലെയുള്ള സാമൂഹിക വിപത്തിനെതിരേയും നിയമനിർമാണം ആവശ്യപ്പെട്ടു കേന്ദ്ര ആഭ്യന്തരമന്ത്രി അമിത് ഷായ്ക്ക് നിവേദനം നൽകുമെന്നും തുഷാർ പറഞ്ഞു.
