തിരുവനന്തപുരം: കേരളത്തിൽ വന്ദേ ഭാരത് എക്സ്പ്രസ് ആദ്യത്തെ 6 ദിവസം കൊണ്ട് ടിക്കറ്റ് ഇനത്തില്‍ മാത്രം നേടിയത് 2.7 കോടിരൂപ. ഏപ്രിൽ 28 മുതൽ മെയ് 3 വരെയുള്ള കണക്കുകളാണ് പുറത്തുവന്നത്.
മികച്ച പ്രതികരണം ലഭിച്ചത് കാസർകോട് നിന്ന് തിരുവനന്തപുരത്തേക്കുള്ള ട്രിപ്പിന്. ഈ ട്രിപ്പിലൂടെ മാത്രം വന്ദേഭാരതിന് ലഭിച്ചത് 1.17 കോടി രൂപയാണ്.
തിരുവനന്തപുരം മുതൽ കാസർകോട് വരെയുള്ള പ്രതിദിന ശരാശരി കളക്ഷൻ 18 ലക്ഷം രൂപയാണ്. തിരുവനന്തപുരം – കാസര്‍ഗോഡ് റൂട്ടിലെ ടിക്കറ്റ് വരുമാനം-ഏപ്രിൽ 28ന് 19.5 ലക്ഷം രൂപ, ഏപ്രിൽ 29ന് 20.30 ലക്ഷം, ഏപ്രിൽ 30ന് 20.50 ലക്ഷം, മേയ് 1ന് 20.1 ലക്ഷം രൂപ, മേയ് 2ന് 18.2 ലക്ഷം രൂപ, മേയ് 3ന് 18 ലക്ഷം രൂപ എന്നിങ്ങനെയാണ്.
അതേസമയം വന്ദേ ഭാരത് കാരണം മറ്റ് ട്രെയിനുകൾ വൈകുന്നില്ലെന്ന് ദക്ഷിണ റെയിൽവേ വ്യക്തമാക്കി. ഏപ്രില്‍ 25ന് പ്രധാനമന്ത്രി നരേന്ദ്രമോദിയാണ് വന്ദേഭാരതിന്‍റെ കന്നിയാത്ര ഫ്ലാഗ് ഓഫ് ചെയ്തത്.
