പമ്പ: ശബരിമല തീര്ഥാടന പാതയിലെ സുപ്രധാനമായ ചാലക്കയം – പമ്പ റോഡ് വികസന പ്രവൃത്തികള് ഒന്നര മാസം കൊണ്ട് പൊതുമരാമത്ത് വകുപ്പ് പൂര്ത്തിയാക്കിയത് വകുപ്പുകളുടെ മികച്ച ഏകോപനത്തിന്റെ തെളിവെന്ന് മന്ത്രി കെ. മുരളീധരന്. ദേവസ്വം ബോര്ഡിന്റെ ഉടമസ്ഥതയിലുള്ള റോഡ് പൊതുമരാമത്ത് വകുപ്പ് ഏറ്റെടുത്ത് നവീകരിക്കാമന്ന നിര്ദേശം മുന്നോട്ടുവച്ചത് പൊതുമരാമത്ത് മന്ത്രിയാണ്.
ദേവസ്വം ബോര്ഡിന്റെ അംഗീകാരം ലഭ്യമാക്കിയതോടെ പദ്ധതിക്ക് തുടക്കമായി. അനുമതിയും സാങ്കേതിക നടപടികളും വേഗത്തിലാക്കി സെപ്റ്റംബറില് അംഗീകാരം ലഭിച്ച പദ്ധതി നവംബറില് തന്നെ പൂര്ത്തിയാക്കാന് കഴിഞ്ഞത് വകുപ്പുകളുടെ മികച്ച ഏകോപനത്തിന്റെ തെളിവാണ്. മണ്ഡല, മകരവിളക്ക് തീര്ഥാടന കാലത്തും വകുപ്പുകളുടെ ഏകോപനം സാധ്യമാക്കുമെന്ന് മന്ത്രി മുരളീധരന് പറഞ്ഞു.
ശബരിമലയില് തിരക്ക് നിയന്ത്രിക്കുന്നതില് പതിനെട്ടാംപടി കയറ്റത്തിന്റെ വേഗം നിര്ണായകമാണ്. ഒരു മിനിറ്റില് 75 തീര്ഥാടകരെ പതിനെട്ടാംപടി കയറ്റാന് കഴിഞ്ഞാല് തിരക്ക് നിയന്ത്രിക്കാനും ദര്ശനം സുഗമമാക്കാനും സാധിക്കും. ഇക്കാര്യത്തില് ആവശ്യമായ നിര്ദേശം പൊലിസിന് നല്കിയിട്ടുണ്ട്. ആഭ്യന്തര മന്ത്രിയുടെ നിര്ദേശപ്രകാരം ഉന്നത പൊലിസ് ഉദ്യോഗസ്ഥരും ക്രമീകരണങ്ങള് വിലയിരുത്തുന്നുണ്ട്.
അപ്പത്തിന്റെയും അരവണയുടെയും ലഭ്യത സംബന്ധിച്ച ആശങ്കകള്ക്ക് അടിസ്ഥാനമില്ലെന്ന് മന്ത്രി വ്യക്തമാക്കി. ഉത്പാദന കേന്ദ്രം നേരിട്ട് സന്ദര്ശിച്ച് ജീവനക്കാരുടെ കഠിനാധ്വാനം ബോധ്യപ്പെട്ടതായും 24 മണിക്കൂറും പ്രവര്ത്തിച്ചാണ് അവര് ഉത്പാദനം ഉറപ്പാക്കുന്നതെന്നും അദ്ദേഹം പറഞ്ഞു. 75 ലക്ഷം ടിന് അരവണ ലഭ്യമാക്കാനായാല് തീര്ഥാടനകാലം സുഗമമായി പൂര്ത്തിയാക്കാന് കഴിയുമെന്ന് ദേവസ്വം ബോര്ഡ് ഉറപ്പുനല്കിയിട്ടുണ്ട്.
ബസ് ബുക്കിംഗിനും പ്രത്യേക സംവിധാനം
ചാലക്കയം- പമ്പ റൂട്ടില് തീര്ഥാടകരുടെ യാത്രാസൗകര്യത്തിനായി വാടക ബസുകള് ഉള്പ്പെടെ അധിക സര്വീസുകള് ഏര്പ്പെടുത്തും. കെഎസ്ആര്ടിസി ആവശ്യമായ ബസുകള് ലഭ്യമാക്കുമെന്ന് ഉറപ്പുനല്കിയിട്ടുണ്ട്. ദേവസ്വം ബോര്ഡിന്റെ നേതൃത്വത്തില് ആരംഭിച്ച വിവരസഹായ കേന്ദ്രത്തിലൂടെ വെര്ച്വല് ക്യൂ, താമസസൗകര്യം, അപ്പം, അരവണ എന്നിവയുടെ ബുക്കിംഗിനൊപ്പം കെഎസ്ആര്ടിസി ബസ് ടിക്കറ്റുകളും നേരിട്ട് ബുക്ക് ചെയ്യാന് സൗകര്യമൊരുക്കിയിട്ടുണ്ട്.
ഒന്നരക്കോടി ചെലവില് തെരുവുവിളക്കുകള്
ചാലക്കയം – പമ്പ റോഡില് ദേവസ്വം ബോര്ഡിന്റെ ഫണ്ടില്നിന്ന് ഒന്നരക്കോടി രൂപ ചെലവഴിച്ച് തെരുവുവിളക്കുകള് സ്ഥാപിച്ചു. കെഎസ്ഇബിയുടെ സഹകരണത്തോടെയാണ് പദ്ധതി പൂര്ത്തിയാക്കിയത്. റോഡ് നവീകരണത്തിന് പിന്നാലെ റോഡ് കുത്തിപ്പൊളിക്കാതെ തന്നെ മികച്ച വെളിച്ച സംവിധാനം ഒരുക്കാന് കഴിഞ്ഞത് വലിയ നേട്ടമാണെന്നും മന്ത്രി മുരളീധരന് പറഞ്ഞു.
ആരോഗ്യ കേന്ദ്രങ്ങളില് ആവശ്യമായ മരുന്നുകള് ലഭ്യമാക്കുന്നതിനും നിര്ദേശം നല്കിയിട്ടുണ്ട്. തീര്ഥാടനവുമായി ബന്ധപ്പെട്ട എല്ലാ സര്ക്കാര് വകുപ്പുകളും തങ്ങളുടെ ചുമതലകള് ഏകോപനത്തോടെ നിര്വഹിച്ചുവരികയാണ്. ഈ വര്ഷത്തെ തീര്ത്ഥാടനകാലം പൂര്ത്തിയായാലുടന് അടുത്ത വര്ഷത്തേക്കുള്ള മുന്നൊരുക്കങ്ങള് ആരംഭിക്കും. നട അടച്ചശേഷം ഫെബ്രുവരി മുതല് തന്നെ അടുത്ത തീര്ഥാടനകാലത്തേക്കുള്ള അടിസ്ഥാന സൗകര്യ വികസന പ്രവര്ത്തങ്ങള് ആരംഭിക്കാനാണ് തീരുമാനമെന്നും മന്ത്രി പറഞ്ഞു.
