നെടുങ്കണ്ടം: നെടുങ്കണ്ടം മൈനര്സിറ്റി സ്വദേശികളായ ഇരട്ട സഹോദരിമാർ അക്സയും അഭിയയും സിനിമാലോകത്തേക്ക് ചുവടുവയ്ക്കുന്നു. നടനും സംവിധായകനുമായ ബൈജു എഴുപുന്ന ഒരുക്കിയ ഹൊറര് ത്രില്ലര് സിനിമയായ കൂടോത്രത്തിലൂടെയാണ് അക്സയും അഭിയയും വെള്ളിത്തിരയില് എത്തുന്നത്. ആദ്യ ചിത്രത്തില്ത്തന്നെ ഇരട്ട സഹോദരികളായി മുഴുനീള കഥാപാത്രങ്ങളെ അവതരിപ്പിക്കാനായതിന്റെ ത്രില്ലിലാണ് ഇരുവരും.
ഇളപ്പാനിക്കല് ബിജു – ടിന്സി ദമ്പതികളുടെ മക്കളായ അക്സയും അഭിയയും അവിചാരിതമായാണ് അഭിനയ ലോകത്ത് എത്തിയത്. സംവിധായകന് ബൈജു എഴുപുന്ന ഇരട്ടക്കുട്ടികളെ അന്വേഷിക്കുന്നതിനിടെ ഇരുവരുടെയും അമ്മ ടിന്സി ഫേസ്ബുക്കില് പങ്കുവച്ച കുട്ടികളുടെ ഫോട്ടോ ചലച്ചിത്ര പിന്നണി പ്രവര്ത്തകര് കാണുകയും അഭിനയിക്കാന് അവസരം നല്കുകയുമായിരുന്നു.
നിരവധി സിനിമകളുടെ നിര്മാതാവായ ബൈജു എഴുപുന്ന സിനിമയില് ചെറുതും വലുതുമായ ഒട്ടനവധി വേഷങ്ങളും ചെയ്തിട്ടുണ്ട്. ബൈജു എഴുപുന്നയുടെ മക്കളായിട്ടാണ് ഇരുവരും സിനിമയിൽ വേഷമിടുന്നത്.ചെമ്മണ്ണാര് സെന്റ് സേവ്യേഴ്സ് സ്കൂളിലെ പ്ലസ് ടു വിദ്യാര്ഥികളായ ഇരുവരും പഠനത്തില് മിടുക്കരാണെങ്കിലും കലാരംഗത്ത് അധികം സജീവമായിരുന്നില്ല. സംവിധായകന് ഒരുക്കിയ അഭിനയകളരിയിലൂടെ പാഠങ്ങള് മനസിലാക്കിയാണ് അഭ്രപാളിയില് ഇരുവരും ചുവടുവയ്ക്കുന്നത്.
സ്കൂളിലെ അധ്യാപകരില്നിന്നും സഹപാഠികളില്നിന്നും മികച്ച പിന്തുണ ലഭിച്ചതോടെ ഇരുവരും അഭിനയിക്കാന് തീരുമാനിക്കുകയായിരുന്നു.പിതാവ് ബിജു നെടുങ്കണ്ടം സുമേരു പ്ലാന്റേഷന് എസ്റ്റേറ്റില് ജോലിക്കാരനാണ്. സഹോദരന് മെല്ബിന് സിവില് എന്ജിനിയറാണ്.ഇടുക്കിയുടെ പശ്ചാത്തലത്തില് ഒരുക്കിയിരിക്കുന്ന സിനിമയില് അണിയറ പ്രവര്ത്തകരായും അഭിനേതാക്കളായും നിരവധി ഇടുക്കിക്കാര് പങ്കാളികളാണ്. കൂടോത്രം 12ന് തിയറ്ററുകളില് എത്തും.
