Day: July 13, 2021

അബുദാബി : അഗ്‌നിസുരക്ഷയ്‌ക്ക്‌ പുതിയ ആശയം നൽകിയാൽ സമ്മാനം. അഗ്നിബാധ തടയുന്നതിനും സുരക്ഷയുറപ്പാക്കുന്നതിനും വേറിട്ട ബോധവത്കരണ ആശയങ്ങൾ നൽകുന്നവർക്കാണ് അബുദാബി സിവിൽ ഡിഫൻസ് സമ്മാനം നൽകുന്നത്. സ്കൂൾ, കോളേജ്, യൂണിവേഴ്‌സിറ്റി വിദ്യാർഥികൾക്ക് വേണ്ടിയാണ് പദ്ധതി നടപ്പാക്കുന്നത്. സുരക്ഷാബോധവത്കരണ സന്ദേശം വ്യക്തമാക്കുന്ന ‘ബോധവത്കരണ ക്ലിപ്പ്’ 2021 ഓഗസ്റ്റ് 10- നുമുമ്പായിട്ടാണ് സമർപ്പിക്കേണ്ടത്. ഒന്നാംസ്ഥാനം നേടുന്നവർക്ക് 15,000 ദിർഹമാണ് സമ്മാനം. രണ്ടും മൂന്നും സ്ഥാനങ്ങൾക്ക് യഥാക്രമം 10,000, 5000 ദിർഹംവീതവും സമ്മാനം ലഭിക്കും. സുരക്ഷിതവും സുസ്ഥിരവുമായ സാമൂഹികാന്തരീക്ഷം ഉറപ്പാക്കുകയെന്ന ലക്ഷ്യത്തോടെയാണ് സാമൂഹിക പങ്കാളിത്തത്തിൽ ആശയങ്ങൾ സ്വീകരിക്കുന്നതെന്ന് സിവിൽ സിവിൽ ഡിഫൻസ് അറിയിച്ചു. റിപ്പോർട്ട്: അനിൽ സി ഇടിക്കുള

കുവൈറ്റ് സിറ്റി: രാജ്യത്തേക്ക് വിദേശികള്‍ക്ക് ഓഗസ്റ്റ് ഒന്നു മുതൽ പ്രവേശനം അനുവദിക്കുമെങ്കിലും ഇന്ത്യയില്‍ നിന്നും നേരിട്ട് വിമാന സര്‍വീസ് ആരംഭിക്കുവാനുള്ള സാധ്യത മങ്ങുന്നു. ഇതുസംബന്ധിച്ച് ഡയറക്ടർ ജനറൽ ഓഫ് സിവിൽ ഏവിയേഷൻ അധികൃതര്‍ക്ക് റിപ്പോര്‍ട്ട് നല്‍കിയതായും റിപ്പോര്‍ട്ടുകളുണ്ട്. കുവൈറ്റ് അംഗീകൃത പൂർണവാക്സിൻ സ്വീകരിച്ചവരെയാണ് രാജ്യത്തേക്ക് പ്രവേശനം അനുവദിക്കുക. ഏറ്റവും പുതിയ റിപ്പോര്‍ട്ടുകള്‍ പ്രകാരം കുവൈറ്റിലേക്ക് യാത്രാനുമതിയുള്ള രാജ്യങ്ങളിൽ 14 ദിവസം കഴിഞ്ഞതിനുശേഷം രാജ്യത്തേക്ക് പ്രവേശനം അനുവദിക്കാമെന്നാണ് ഡിജിസിഎ നിര്‍ദ്ദേശിച്ചിരിക്കുന്നത്. ഇന്ത്യയിൽ കോവിഡ് വ്യാപനം കുറയാത്ത സാഹചര്യത്തിലാണ് ഡിജിസിഎ നടപടിയെന്ന് കരുതുന്നു. ഇതോടെ ഇന്ത്യയിൽ നിന്നും കുവൈറ്റിലേക്ക് മടങ്ങിവരുന്ന ആയിരക്കണക്കിന് പ്രവാസികളുടെ യാത്രയാണ് പ്രതിസന്ധിയിലായിരിക്കുന്നത്. റിപ്പോർട്ട്: സലിം കോട്ടയിൽ