വ്യാജ സാനിറ്റൈസര്‍ വിറ്റ് കോടികള്‍ സമ്പാദിച്ച യുവാവ് ഗുജറാത്തില്‍ പിടിയിലായി. പത്തുലക്ഷം രൂപ മൂല്യം വരുന്ന വ്യാജ സാനിറ്റൈസര്‍ കുപ്പികള്‍ കടയില്‍ നിന്ന് പിടിച്ചെടുത്തതോടെയാണ് യുവാവിലേക്ക് അന്വേഷണം എത്തിയത്.
വഡോദരയിലാണ് സംഭവം. രണ്ടു കടയില്‍ ക്രൈംബ്രാഞ്ച് നടത്തിയ പരിശോധനയ്‌ക്കൊടുവിലാണ് വ്യാജ സാനിറ്റൈസര്‍ പിടിച്ചെടുത്തത്.
തുടര്‍ന്ന്് നടത്തിയ അന്വേഷണത്തില്‍ നിതിന്‍ എന്ന യുവാവ് അറസ്റ്റിലാവുകയായിരുന്നു. പത്തുമാസം കൊണ്ട് ഇത്തരത്തില്‍ വ്യാജ സാനിറ്റൈസര്‍ വിറ്റ് നിതിന്‍ പത്തുകോടി രൂപ സമ്പാദിച്ചതായി പൊലീസ് കണ്ടെത്തി.
അപകടസാധ്യതയുള്ള മെഥനോള്‍ ചേര്‍ന്ന സാനിറ്റൈസറാണ് കടകള്‍ വഴി ഇയാള്‍ വിറ്റിരുന്നത്. ഇയാളുടെ സ്വന്തം നിര്‍മ്മാണ യൂണിറ്റിലാണ് ഇത് ഉല്‍പ്പാദിപ്പിച്ചിരുന്നത്. മെഥനോള്‍ വിതരണം ചെയ്ത വ്യക്തികളെയും പൊലീസ് പിടികൂടിയിട്ടുണ്ട്.
