ഇടുക്കി: ജില്ലാ ശുചിത്വ മിഷന് റീബോണ് എന്ന പേരില് പ്ലാസ്റ്റിക്ക് കുപ്പികള് കൊണ്ട് ഒരുക്കിയ ക്രിസ്മസ് ട്രീ ശ്രദ്ധാകേന്ദ്രമാകുന്നു. ഇടുക്കി സെന്റ് ജോര്ജ് പള്ളിക്കു സമീപം ജില്ലാ ശുചിത്വ മിഷന് കാര്യാലയത്തിനു മുന്നിലായാണ് നാലു മീറ്റര് ഉയരത്തില് കുപ്പി മരം ഒരുക്കിയത്.
ഹരിതകര്മസേന വീടുകളില്നിന്നും സ്ഥാപനങ്ങളില്നിന്നും ശേഖരിച്ച പച്ചനിറത്തിലുള്ള ശീതളപാനീയ കുപ്പികളാണ് നിര്മാണത്തിനായി കൂടുതല് ഉപയോഗിച്ചത്. അഞ്ചു ലിറ്ററിന്റെയും, ഒരു ലിറ്ററിന്റെയും കുടിവെള്ള കുപ്പികളും ഉപയോഗിച്ചിട്ടുണ്ട്.
ആറായിരത്തോളം പ്ലാസ്റ്റിക്ക് കുപ്പികള് ഇലയുടെ ആകൃതിയില് മുറിച്ചെടുത്താണ് ഉപയോഗിച്ചത്. ട്രീയുടെ ഫ്രെയിം നിര്മാണത്തിനായി ആക്രി കടകളില്നിന്നും ശേഖരിച്ച പഴയ ഇരുമ്പു കമ്പികളും മറ്റുമാണ് ഉപയോഗിച്ചത്. പ്ലാസ്റ്റിക്ക് കുപ്പികളുടെ ചുവടു ഭാഗം ഉപയോഗിച്ചു നിര്മിച്ച സാന്താ ക്ലോസിന്റെ വടിയാണ് മറ്റൊരു ആകര്ഷണം.
കുപ്പിയുടെ അടപ്പുകള്, ചുവട് എന്നിവകൊണ്ട് തയാറാക്കി നിറം പകര്ന്ന അലങ്കാരബോളുകളും കുപ്പിമരത്തിനു പകിട്ടേകുന്നു. ആര്ട്ടിസ്റ്റായ ജയകൃഷ്ണന്റെ സഹായത്തോടെയാണ് ജില്ലാശുചിത്വമിഷന് ഉദ്യോഗസ്ഥര് കുപ്പിമരം നിര്മിച്ചത്.
അഞ്ചു ലിറ്റര് വാട്ടര് ബോട്ടിലുകള് കൊണ്ട് തയാറാക്കിയ സമ്മാനപ്പൊതികള്വച്ച് അലങ്കരിച്ചിട്ടുമുണ്ട്. നക്ഷത്രം നിര്മിച്ചിരിക്കുന്നത് ഈറ്റ, തയ്യല്ക്കാരില്നിന്നും ശേഖരിച്ച തുണിക്കഷണങ്ങള്, കുപ്പിയുടെ ചുവടു ഭാഗം എന്നിവ ഉപയോഗിച്ചാണ്.
സര്ക്കാരിന്റെ നാലാം വാര്ഷിക എക്സിബിഷനു വേണ്ടി ഉപയോഗിച്ച തഴപ്പായില് തയാറാക്കിയ ബോര്ഡില് കുപ്പിയുടെ അടപ്പുകള് ഉപയോഗിച്ചാണ് ആശംസകള് തയാറാക്കിയിരിക്കുന്നത്. സെന്റ് ജോര്ജ് പള്ളി വികാരി ഫാ. സിജോ മേക്കുന്നേല് റീബോണ് ക്രിസ്മസ് ട്രീ ജനങ്ങള്ക്കായി സമര്പ്പിച്ചു.
