ബോളിവുഡ് നടൻ അക്ഷയ് കുമാര് നായകനാവുന്ന പുതിയ ചിത്രത്തിന്റെ ഷൂട്ടിംഗ് അടുത്തിടെയാണ് കേരളത്തിലെ മൂന്നാറില് നടന്നത്. ചിത്രത്തില് നായികയായ വിദ്യാബാലനോടൊപ്പം അക്ഷയ് കുമാര് ഹെലികോപ്റ്ററില് മൂന്നാറില് പറന്നിറങ്ങിയത് വലിയ വാർത്തയായിരുന്നു.
മൂന്നാറിലെ ഷൂട്ടിംഗ് പൂര്ത്തിയാക്കിയശേഷം താരം അടുത്ത ഘട്ട ഷൂട്ടിംഗിനായി മുംബൈയിലേക്ക് മടങ്ങിയതായും റിപ്പോർട്ടുകൾ വന്നിരുന്നു എന്നാൽ അടിയന്തിരമായി നേത്ര ശസ്ത്രക്രിയയ്ക്കായി താരത്തെ ആശുപത്രിയില് പ്രവേശിപ്പിച്ചതിനെത്തുടര്ന്ന് ഷൂട്ടിംഗ് താത്കാലികമായി നിര്ത്തിവെച്ചിരിക്കുകയാണ്.
കാഴ്ചശക്തി കൃത്യമാക്കാനുള്ള മൈനര് ശസ്ത്രക്രിയയ്ക്കാണ് താരത്തെ ആശുപത്രിയിൽ പ്രവേശിപ്പിച്ചത്. ശസ്ത്രക്രിയ പൂര്ത്തിയാക്കിയ താരം ഇപ്പോള് വീട്ടില് വിശ്രമത്തിലാണ്. നിർത്തിവച്ച ഷൂട്ടിംഗ്
വൈകാതെ പുനരാരംഭിക്കുമെന്നാണ് ലഭിക്കുന്ന സൂചന.
മേയ് അഞ്ചോടെയാണ് സിനിമയുടെ കേരളത്തിലെ ചിത്രീകരണം പൂര്ത്തിയായത്. അനീസ് ബസ്മി സംവിധാനം ചെയ്യുന്ന ചിത്രത്തിനു പേരിട്ടിട്ടില്ല. രാശി ഖന്ന, രാജ്പാല് യാദവ് എന്നിവരും പ്രധാന വേഷങ്ങളില് എത്തുന്നുണ്ട്. അക്ഷയ് കുമാറും വിദ്യാബാലനും ഒന്നിക്കുന്ന നാലാമത്തെ ചിത്രമാണിത്. ഹേയ് ബേബി, ഭൂല് ഭൂലയ്യ, മിഷന് മംഗള് എന്നീ ചിത്രങ്ങളിലാണ് ഇരുവരും മുമ്പ് ഒന്നിച്ച് അഭിനയിച്ചത്.
