മൂന്നാര്: മൂന്നാറില് ഗതാഗതക്കുരുക്ക് രൂക്ഷമായി തുടരുമ്പോള് അലക്ഷ്യമായി അലഞ്ഞുതിരിയുന്ന കന്നുകാലികള്മൂലം ഉണ്ടാകുന്ന ഗതാഗത തടസവും പതിവാകുന്നു.കഴിഞ്ഞ ദിവസം മൂന്നാര് ടൗണില് എത്തിയ പശുക്കളാണ് റോഡിനു നടുവില് നിലയുറപ്പിച്ച് ഗതാഗത തടസം ഉണ്ടാക്കിയത്.
മൂന്നാര് ജനറല് ഹോസ്പിറ്റല് റോഡിലാണ് കുരുക്ക് ഉണ്ടായത്. കഴിഞ്ഞ ദിവസങ്ങളില് എല്ലാംതന്നെ കനത്ത ഗതാഗതക്കുരുക്ക് അനുഭവപ്പെട്ട മൂന്നാറില് പ്രശ്നപരിഹാരത്തിന് വഴികള്തേടി വരുന്നതിനിടയിലാണ് പശുക്കള് അലക്ഷ്യമായി റോഡിലൂടെ അലഞ്ഞുതിരിയുന്നത്.ഗതാഗതക്കുരുക്കിനു പുറമേ പശുക്കള് എത്തുന്നത് യാത്രാക്കാരായ കുട്ടികള്ക്ക് ഭയം സൃഷ്ടിക്കുന്നുണ്ട്. വീട്ടില് വളര്ത്തുന്ന കന്നുകാലികളെ ഉടമകള് അലക്ഷ്യമായി അഴിച്ചുവിടുന്നതാണ് പ്രശ്നത്തിനു കാരണമെന്നുള്ള ആക്ഷേപമാണ് ഉയരുന്നത്.
ഒരാഴ്ചകൂടി കഴിഞ്ഞാല് മഴക്കാലം എത്തുമെന്നിരിക്കേ സഞ്ചാരികളുടെ നല്ല തിരക്കാണ് മൂന്നാറില് അനുഭവപ്പെടുന്നത്. വിനോദസഞ്ചാര കേന്ദ്രങ്ങളായ മാട്ടുപ്പെട്ടി, എക്കോപോയിന്റ്, കൊരണ്ടക്കാട് ഫോട്ടോ പോയിന്റ്, റോസ് ഗാര്ഡന്, ഇക്കാനഗര്, മൂന്നാര് ടൗണ്, രാജമല എന്നിവിടങ്ങളാണ് സഞ്ചാരികളുടെ ഇഷ്ടകേന്ദ്രം.
ഇവിടങ്ങളിലാണ് ഗതാഗതക്കുരുക്കും രൂക്ഷമായി അനുഭവപ്പെട്ടത്. തമിഴ്നാടില്നിന്നുള്ള സഞ്ചാരികളാണ് കൂടുതലായി എത്തുന്നത്. മൂന്നാര് ഹൈറേഞ്ച് ആശുപത്രി റോഡില് വാഹനങ്ങള് പാര്ക്കുചെയ്യുന്നതുമൂലം ആംബുലന്സ് ഉള്പ്പെടെയുള്ള വാഹനങ്ങള്ക്ക് ബുദ്ധിമുട്ട് സൃഷ്ടിക്കുന്ന സാഹചര്യത്തില് ഗതാഗതക്കുരുക്ക് എത്രയും വേഗം പരിഹരിക്കണമെന്നുള്ള ആവശ്യമാണ് ഉയരുന്നത്.
