എക്കാലവും ഭക്ഷണപ്രിയരുടെ ഇഷ്ടകേന്ദ്രമാണ് ഹരിയാനയിലെ മുർതൽ. എന്നാൽ ഇപ്പോൾ പരമ്പരാഗത രുചികൾക്കപ്പുറം മറ്റൊരു കൗതുകകരമായ കാഴ്ചയാണ് ഇവിടെ നിന്നും വൈറലാകുന്നത്. സാധാരണയായി വെയ്റ്റർമാർ ട്രേയുമായി ഓടിനടക്കുന്ന ധാബകളിൽ നിന്നും വ്യത്യസ്തമായി ഇവിടെ അതിഥികൾക്ക് ഭക്ഷണമെത്തിക്കുന്നത് ഒരു റോബോട്ട് ആണ്!
തിളങ്ങുന്ന ചുവന്ന എൽഇഡി കണ്ണുകളും ഫൈബറിൽ തീർത്ത ശരീരവുമുള്ള ഈ റോബോട്ട് കാണാൻ തന്നെ ഏറെ കൗതുകകരമാണ്. ഇത് കുട്ടികളെയും മുതിർന്നവരെയും ഒരുപോലെ ആകർഷിക്കുന്നു.
അടുക്കളയിൽ തയാറാക്കുന്ന ഭക്ഷണം റോബോട്ടിന്റെ ട്രേയിൽ വയ്ക്കുന്നു. തുടർന്ന് ഇതിന്റെ പ്രത്യേക നാവിഗേഷൻ സിസ്റ്റവും സോഫ്റ്റ്വെയറും ഉപയോഗിച്ച് റോബോട്ട് കൃത്യമായ മേശയിലേക്ക് ഭക്ഷണം എത്തിക്കുന്നു.
ബംഗളൂരുവിൽ നിന്നുള്ള വിദഗ്ധ സംഘത്തിന്റെ സഹായത്തോടെയാണ് ഈ റോബോട്ട് വികസിപ്പിച്ചെടുത്തത്. ഒറ്റ ചാർജിൽ ഒന്നര മുതൽ രണ്ട് മണിക്കൂർ വരെ പ്രവർത്തിക്കാൻ ഇതിന് സാധിക്കും. റിമോട്ട് വഴിയും ഇത് നിയന്ത്രിക്കാൻ കഴിയും.
ഭക്ഷണശാലയിലെ ജീവനക്കാരെ പൂർണമായി ഒഴിവാക്കിക്കൊണ്ടല്ല ഈ റോബോട്ടിന്റെ പ്രവർത്തനം. പരമ്പരാഗത ധാബയ്ക്കൊപ്പം അല്പം ആധുനികതയും ചേർക്കുക മാത്രമാണ് ഇതിലൂടെ ചെയ്യുന്നത്. അതുകൊണ്ട് ജീവനക്കാർക്കും ജോലിക്കാര്യത്തിൽ പേടിക്കേണ്ടതില്ല.
അതേസമയം, ടോയ്ട്രെയിനിലൂടെ ടേബിളുകളിൽ ഭക്ഷണം എത്തിക്കുന്ന വിദ്യ ഇവിടെ നേരത്തെ തന്നെ ജനശ്രദ്ധ നേടിയിരുന്നു.
