അമ്പലപ്പുഴ: കണ്ണന്റെ തിരുനടയിൽ നിസ്വാർഥ സേവനം നടത്തി മൂന്നു കൃഷ്ണഭക്തർ. അമ്പലപ്പുഴ പുത്തൻപുരക്കൽ ബാലാമണി, ആറാട്ടുപറമ്പിൽ നിഷ, അമ്പാടിയിൽ പുഷ്പ ആർ. നായർ എന്നിവരാണ് കാലങ്ങളായി അമ്പലപ്പുഴ ശ്രീകൃഷ്ണസ്വാമി ക്ഷേത്രത്തിൽ ഭക്തർക്ക് കൂപ്പൺ നൽകി സംഭാവന ശേഖരിക്കാൻ സേവനം ചെയ്യുന്നത്.
ക്ഷേത്രത്തിലെത്തുന്ന ഭക്തർക്ക് ഇവർ വർഷങ്ങളായി ചിരപരിചിതരാണ്. ആനക്കൊട്ടിലിലാണ് ഇവരുടെ ഇരിപ്പിടം. പന്ത്രണ്ട് കളഭം, പള്ളിപ്പാന എന്നീ ചടങ്ങുകൾക്ക് ഭക്തരിൽനിന്ന് പണം ശേഖരിക്കുന്നതിനായി കൂപ്പൺ വിതരണവുമായി ഇവർ സേവനം ചെയ്യുന്നത്.
രാവിലെ 7.30 മുതൽ രാത്രി 8.30 വരെ വിശ്രമമില്ലാതെയാണ് ഉണ്ണിക്കണ്ണന്റെ തിരുനടയിലെ ചടങ്ങുകൾ വിജയിപ്പിക്കാൻ ഈ വനിതകളുള്ളത്. ഇപ്പോൾ 12 വർഷത്തിലൊരിക്കൽ നടക്കുന്ന പള്ളിപ്പാന വിജയത്തിനുള്ള ശ്രമത്തിലാണ് ഈ കൃഷ്ണ ഭക്തകൾ.
ക്ഷേത്രത്തിലെത്തുന്ന ഭക്തരോട് പള്ളിപ്പാനയുടെ പ്രാധാന്യം പറഞ്ഞ് കൂപ്പൺ നൽകി ഇതിനാവശ്യമായ പണം സമാഹരിക്കുകയാണ് ഇവർ. ഭഗവാനു വേണ്ടി ജീവിതം സമർപ്പിച്ചിരിക്കുകയാണ് ഈ വനിതകൾ
