കോല്‍ക്കത്ത: ബിജെപി ദേശീയ അധ്യക്ഷൻ അമിത് ഷായ്ക്ക് തങ്ങളുടെ കുടിലിൽ ഇലവെട്ടിയിട്ട് ഊണ് നൽകിയ ദമ്പതികൾ ഒരാഴ്ച കഴിഞ്ഞപ്പോൾ തൃണമൂൽ കോൺഗ്രസിൽ. വടക്കൻ ബംഗാളിലെ നക്സൽബാരി സ്വദേശികളായ ഗീതാ മഹാലി – രാജു ദമ്പതികളാണ് മമതാ ബാനർജിയുടെ തൃണമൂൽ കോൺഗ്രസിൽ ചേർന്നത്. സംസ്ഥാന ടൂറിസം മന്ത്രി ഗൗതം ദേബാണ് ദമ്പതികളെ പാർട്ടിയിലേക്ക് സ്വാഗതം ചെയ്തത്. നക്‌സല്‍ബാരിയിലെ ബ്ലോക് ഓഫീസ് ഹാളില്‍ നടന്ന ചടങ്ങില്‍ ഇരുവരും തൃണമൂല്‍ പതാക ഏറ്റുവാങ്ങി. പശ്ചിമബംഗാളില്‍ സ്വാധീനം ശക്തമാക്കാനുള്ള ബിജെപിയുടെ തന്ത്രങ്ങള്‍ക്ക് സംഭവം തിരിച്ചടിയായി.
കഴിഞ്ഞ ആഴ്ച പശ്ചിമ ബംഗാൾ സന്ദർശനത്തിനിടെയാണ് ഗോത്രവര്‍ഗ വിഭാഗത്തില്‍പ്പെട്ട ദമ്പതിമാരുടെ വീട്ടിൽനിന്നും അമിത് ഷായും സംഘവും ഭക്ഷണം കഴിച്ചത്. വാഴ ഇലയിലാണ് ദമ്പതികൾ അമിത് ഷായ്ക്ക് സസ്യാഹാരം വിളമ്പിയത്. നിലത്തിരുന്ന് ദമ്പതികൾ വിളമ്പിയ ഭക്ഷണം ഷായും സംഘവും കഴിച്ചു. മഹാലിയും രാജുവും അമിത് ഷായ്ക്കൊപ്പം ചിത്രങ്ങൾ എടുക്കുകയും ചെയ്തു. സംഭവം ഇതോടെ വാർത്താപ്രാധാന്യം നേടുകയും ചെയ്തു. എന്നാൽ ഒരാഴ്ചയ്ക്കു ശേഷം ദമ്പതികൾ ബിജെപിവിട്ട് തൃണമൂലിൽ ചേർന്നിരിക്കുകയാണ്.
തൃണമൂൽ കോൺഗ്രസ് തങ്ങളുടെ പ്രവർത്തകരെ തട്ടിക്കൊണ്ടുപോയതായാണ് ബിജെപി ആരോപിക്കുന്നത്. ദമ്പതികളെ തൃണമൂല്‍ കോണ്‍ഗ്രസ് നേതാക്കള്‍ തട്ടിക്കൊണ്ടുപോയി പാര്‍ട്ടിയില്‍ ചേര്‍ത്തതാണെന്ന് ബിജെപി സംസ്ഥാന അധ്യക്ഷന്‍ ദിലീപ് ഘോഷ് ആരോപിച്ചു.
ദമ്പതികളെ ചൊവ്വാഴ്ച മുതല്‍ കാണാതായിരുന്നു. ബിജെപി പ്രവര്‍ത്തകര്‍ തെരച്ചില്‍ നടത്തിയെങ്കിലും കണ്ടെത്താനായില്ല. അവരുടെ മൊബൈല്‍ ഫോണുകള്‍ സ്വിച്ച് ഓഫ് ചെയ്ത നിലയിലായിരുന്നു. പാര്‍ട്ടി പ്രവര്‍ത്തകര്‍ പരാതിയുമായി നക്‌സല്‍ബാരി പോലീസ് സ്‌റ്റേഷനില്‍ എത്തിയെങ്കിലും പരാതി സ്വീകരിക്കാന്‍ പോലീസ് തയാറായില്ലെന്നും ബിജെപി നേതാക്കള്‍ ആരോപിക്കുന്നു.
എന്നാല്‍ ദമ്പതികള്‍ സ്വന്തം ഇഷ്ടപ്രകാരമാണ് പാര്‍ട്ടിയില്‍ ചേര്‍ന്നതെന്ന് തൃണമൂല്‍ കോണ്‍ഗ്രസ് നേതാക്കള്‍ അവകാശപ്പെട്ടു. പെയിന്‍റിംഗ് തൊഴിലാളിയാണ് രാജു. തേയില തോട്ടം തൊഴിലാളിയാണ് ഭാര്യ ഗീതാ മഹാലി.
