മനുഷ്യനെ ഏകാന്തതയിലേക്ക് തള്ളി വിടുന്ന പല കാര്യങ്ങളുണ്ട്. ഒറ്റപ്പെടലാകാം അവഗണനകളാകാം. അങ്ങനെ പലതും മനുഷ്യൻ വിഷാദത്തിലേക്ക് കടക്കാൻ കാരണമാകുന്നു. ധാരാളം സമ്പാദിച്ച് കൂട്ടിയിട്ട് യാതൊരു കാര്യവുമില്ല നമുക്ക് എല്ലാക്കാര്യങ്ങളും പങ്കുവയ്ക്കാൻ കൂടെ ഒരാൾ വേണമെന്ന് പറഞ്ഞ് പോസ്റ്റുമായി യുവാവ് രംഗത്ത്.
സുദർശൻ എന്ന പേരുള്ള യുവാവാണ് വിദേശജീവിതം തന്നെ മാനസികമായി എത്രത്തോളം തളർത്തിയെന്ന് വ്യക്തമാക്കിക്കൊണ്ട് വികാരഭരിതനായി രംഗത്തെത്തിയത്. താൻ ധാരാളം പണം സമ്പാദിക്കുന്നുണ്ട് എന്നാലും കൂട്ടിന് ആരും ഇല്ലാത്തത് കടുത്ത ഒറ്റപ്പെടലും അവഗണനയ്ക്കും കാരണമാകുന്നെന്ന് സുദർശൻ പറഞ്ഞു.
കാനഡ മനുഷ്യനെ വിഷാദത്തിലേക്ക് തള്ളി വിടുന്നു എന്ന് പറഞ്ഞ് സുദർശൻ പങ്കുവച്ച വീഡിയോ സോഷ്യൽ മീഡിയയിൽ വൈറലായി. കൂടെ ചെലവഴിക്കാൻ പ്രിയപ്പെട്ടവരായി ആരുമില്ലെങ്കിൽ പിന്നെ എത്ര പണം ഉണ്ടായിട്ട് എന്താണ് കാര്യം? വളരെ നാളുകൾക്ക് ശേഷമാണ് ഞാൻ ഇപ്പോൾ മനസ്സറിഞ്ഞ് ഒന്ന് ചിരിക്കുന്നത്. കാരണം കാനഡ ആളുകളെ കടുത്ത മാനസിക വിഷാദത്തിലേക്ക് തള്ളിവിടുന്ന ഒരു രാജ്യമാണ്. നിങ്ങളിൽ ആർക്കൊക്കെയാണ് എൻറെ അഭിപ്രായത്തോട് യോജിപ്പുള്ളത്?’എന്നു ചോദിച്ചാണ് സുദർശന്റെ വീഡിയോ.
‘അടുത്തത് ആരാണ്’ എന്ന അടിക്കുറിപ്പോടെ പങ്കുവച്ച ഈ വീഡിയോ ക്ലിപ്പ് പെട്ടെന്ന് തന്നെ വൈറലായി. ഇയാളുടെ അഭിപ്രായത്തെ അനുകൂലിച്ചും പ്രതികൂലിച്ചും സോഷ്യൽ മീഡിയയിൽ സമ്മിശ്ര പ്രതികരണങ്ങളാണ് വരുന്നത്. കാനഡയിലെ ശുദ്ധമായ വായുവും മികച്ച ജീവിതസാഹചര്യങ്ങളും ആസ്വദിക്കണമെങ്കിൽ ചില ത്യാഗങ്ങൾ ചെയ്യേണ്ടി വരുമെന്ന് ഒരു കൂട്ടർ വാദിക്കുന്പോൾ യുവാവിനെ പിന്തുണയ്ക്കുന്നവരും കുറവല്ല.
