രണ്ടാമത്തെ കുഞ്ഞിന്റെ വരവറിയിച്ച് ബോളിവുഡ് താരദമ്പതികളായ ദീപിക പദുകോണും രൺവീർസിങ്ങും. ദീപിക തന്നെയാണ് വീണ്ടും അമ്മയാകാൻ പോകുന്നു എന്ന സന്തോഷ വാർത്ത സമൂഹമാധ്യമത്തിലൂടെ പങ്കുവച്ചത്.
പോസിറ്റിവ് രേഖപ്പെടുത്തിയ പ്രഗ്നന്സി ടെസ്റ്റ് കിറ്റ് മകൾ ദുവ കയ്യിൽ പിടിച്ചിരിക്കുന്ന ചിത്രമാണ് രണ്ട് ഈവിൾ ഐ ഇമോജി കുറിച്ചു കൊണ്ട് ദീപിക പങ്കുവച്ചിരിക്കുന്നത്. സമൂഹമാധ്യമങ്ങളിൽ പങ്കുവച്ച ദീപികയുടെ പോസ്റ്റ് നിമിഷങ്ങൾക്കകം തന്നെ ശ്രദ്ധനേടി. ആരാധകരും താരങ്ങളും അടക്കം നിരവധി ആളുകളാണ് ദീപികയ്ക്കും രൺവീറിനും ആശംസകളറിയിച്ചുകൊണ്ട് രംഗത്തെത്തിയത്.
ദീപികയെയും രൺവീറിനെയും മാതൃകാ ദന്പതികൾ എന്നും പലരും കമന്റ് ബോക്സിൽ വിശേഷിപ്പിച്ചു. വിവാഹമോചന വാർത്തകൾ പ്രചരിപ്പിച്ച ആളുകൾ ഇപ്പോൾ എവിടെപോയി എന്നായിരുന്നു മറ്റുപലരുടെയും ചോദ്യങ്ങൾ.
2018ലാണ് ബോളിവുഡ് താരങ്ങളായ ദീപിക പദുക്കോണും രൺവീർ സിങ്ങും വിവാഹിതരായത്. ഇറ്റലിയിലെ ലേക്ക് കോമോയിലായിരുന്നു ആഡംബര വിവാഹം. ദീർഘനാളത്തെ ഡേറ്റിങ്ങിനു ശേഷമായിരുന്നു വിവാഹം. 2024 സെപ്റ്റംബർ 8നായിരുന്നു ദീപികയ്ക്കും രൺവീറിനും ആദ്യത്തെ കുഞ്ഞ് ദുവ ജനിച്ചത്.
