അടിച്ചു പൂക്കുറ്റിയായപ്പോള്‍ ആനയെ കിസ്സടിക്കണം എന്നു തോന്നി ! കാട്ടാനയെ ഉമ്മ വയ്ക്കാന്‍ പോയ യുവാവിന് കിട്ടിയത് എട്ടിന്റെ പണി; വീഡിയോ വൈറലാകുന്നു…

ബംഗളൂരു: മദ്യപിച്ച് ലക്കുകെട്ടാല്‍ പിന്നെ ചെയ്യുന്നതൊന്നും പലര്‍ക്കും ഓര്‍മയുണ്ടാവില്ല. ഇത്തരമൊരു അവസരത്തില്‍ കാട്ടാനയെ ഉമ്മ വയ്ക്കാന്‍ പോയ യുവാവിന് കിട്ടിയത് എട്ടിന്റെ പണി. മദ്യലഹരിയില്‍ കാട്ടാനയെ ഉമ്മവയ്ക്കാന്‍ പോയ 24കാരനെ ഗുരുതരമായ പരിക്കുകളോടെ ആശുപത്രിയില്‍ പ്രവേശിപ്പിച്ചിരിക്കുകയാണ്. ബംഗളൂരുവില്‍ നിന്നും 50 കിലോമീറ്റര്‍ അകലെ മലൂര്‍ എന്ന സ്ഥലത്താണ് സംഭവം. കര്‍ണാടക-തമിഴ്‌നാട് അതിര്‍ത്തി പ്രദേശത്തുള്ള ഈ ഗ്രാമത്തില്‍ കാട്ടാനയിറങ്ങുന്നത് പതിവാണ്.

സംഭവ ദിവസം നാട്ടിലിറങ്ങിയ ആറ് കാട്ടാനകളെ പോലീസ് ഉദ്യോഗസ്ഥരും വനം വകുപ്പ് ഉദ്യോഗസ്ഥരും ചേര്‍ന്ന് കാട്ടിലേക്ക് മടക്കി അയക്കാന്‍ ശ്രമിച്ചിരുന്നു. ഇവര്‍ക്കൊപ്പം പ്രദേശവാസികളുമുണ്ടായിരുന്നു. എന്നാല്‍ ഇവരോട് കൂടെ വരരുതെന്ന് അധികൃതര്‍ നിര്‍ദ്ദേശം നല്‍കിയിരുന്നുവെങ്കിലും ഇത് അനുസരിക്കുവാന്‍ പ്രദേശവാസികള്‍ തയാറായിരുന്നില്ല. ആനയെ കാട്ടിലേക്ക് ഓടിക്കാന്‍ ശ്രമിക്കുന്നതിനിടെ ചിലര്‍ സെല്‍ഫിയെടുക്കാനായി ബഹളമുണ്ടാക്കി. ഇതില്‍ കലിപ്പ് മൂത്ത ആന ആളുകള്‍ക്കു നേരെ ഓടിയടുക്കുകയായിരുന്നു. ആന വരുന്നത് കണ്ട് ആളുകള്‍ ചിതറിയോടുകയും ചെയ്തു.

അല്‍പ്പ സമയത്തിനു ശേഷം പ്രദേശവാസിയായ രാജു എന്നയാളെ കാണാതായിരുന്നു. തുടര്‍ന്ന് എല്ലാവരും നടത്തിയ തെരച്ചിലിനൊടുവിലാണ് പരിക്കേറ്റ് രക്തം വാര്‍ന്ന് കിടക്കുന്ന രാജുവിനെ കണ്ടെത്തുന്നത്. ആനയെ കണ്ട് ഓടുന്നതിനിടെ യുക്കാലിപ്റ്റ്‌സ് മരത്തില്‍ ഇടിച്ച് രാജുവിന് പരിക്കേറ്റതാകാമെന്നാണ് ആദ്യം കരുതിയത്. എന്നാല്‍ ഒരു കന്നഡ സിനിമയിലെ രംഗം അനുകരിച്ച് ആനയെ ഉമ്മ വയ്ക്കാന്‍ രാജു ശ്രമിച്ചതാണ് അപകടകാരണമെന്നാണ് പ്രദേശവാസികള്‍ പറയുന്നത്. ഇപ്രകാരം താന്‍ ചെയ്യുമന്ന് രാജു പറഞ്ഞതായും പ്രദേശവാസികള്‍ വ്യക്തമാക്കി. എന്തായാലും കിസ്സടി നടന്നോയെന്ന് അറിയണമെങ്കില്‍ ഇയാളോടു തന്നെ ചോദിക്കണം.

Related posts