മിമിക്രിയിലൂടെ സിനിമയിലെത്തിയ താരമാണ് ജാഫര്‍ ഇടുക്കി. സീരിയലുകളിലെ തമാശകള്‍ സിനിമയിലും ക്ലിക്കായതോടെ ഈ ഇടുക്കിക്കാരന്റെ ഭാഗ്യവും തെളിഞ്ഞു. എന്നാല്‍ കലാഭവന്‍ മണിയുടെ മരണത്തോടെ ജാഫറും സംശയനിഴലിലായി. തലേദിവസം മണിക്കൊപ്പം പാഡിയില്‍ ഉണ്ടായിരുന്നുവെന്ന വെളിപ്പെടുത്തലാണ് ജാഫറിന്റെ ജീവിതത്തെ മാറ്റിമറിച്ചത്. അതോടെ പല സിനിമകളില്‍ നിന്നും താരം സ്വയം ഒഴിവായി.
ഇപ്പോള്‍ ചില വെളിപ്പെടുത്തലുകളുമായി വരുകയാണ് ജാഫര്‍. മണിയുമായുള്ള സൗഹൃദത്തത്തിന്റെ പേരില്‍ ഇന്നും ഞങ്ങള്‍ നാല്‍പതു പേര്‍ തീ തിന്നു കൊണ്ടിരിക്കുകയാണ്. സിബിഐ ഏറ്റെടുത്ത കേസ് തെളിയുന്നതോടെ മാത്രമേ എന്നെ പോലെയുള്ള ആളുകള്‍ മണിയുടെ സുഹൃത്തായിരുന്നോ വില്ലനായിരുന്നോ എന്നൊക്കെ തെളിയുകയുള്ളൂ. ജാഫര്‍ പറയുന്നു. ഓഫറുകള്‍ വന്നിരുന്നു. പക്ഷേ സ്വീകരിക്കാന്‍ മനസനുവദിച്ചില്ല.
തോപ്പില്‍ ജോപ്പനില്‍ അഭിനയിക്കാന്ഡ മേക്കപ്പ് ഇട്ടതിന് ശേഷമാണ് പിന്മാറിയത്. ചാനലുകളിലും പത്രങ്ങളിലും വരുന്ന ആരോപണങ്ങള്‍ കുടുംബാംഗങ്ങള്‍ക്ക് വലിയ വിഷമമാണുണ്ടാക്കിയത്. മഹേഷിന്റെ പ്രതികാരത്തിലെ വേഷത്തിന് നല്ല പ്രതികരണം ലഭിച്ച് നില്‍ക്കുമ്പോളായിരുന്നു മണിയുടെ മരണം. സിനിമയില്‍ നിന്ന് അകന്നുപോയ എന്നെ നാദിര്‍ഷയാണ് വീണ്ടും തിരിച്ചു കൊണ്ടുവരുന്നത്. രണ്ടാം വരവിലിപ്പോള്‍ പന്ത്രണ്ടോളം ചിത്രങ്ങളില്‍ അഭിനയിച്ചു കഴിഞ്ഞു- ജാഫര്‍ പറയുന്നു.
