ജമ്മു: ഔദ്യോഗിക ഓൺലൈൻ യോഗത്തിനിടെ മുതിർന്ന ഐഎഎസ് ഉദ്യോഗസ്ഥൻ വനിതാ കീഴുദ്യോഗസ്ഥയോട് മോശമായി പെരുമാറിയതിനെ തുടർന്ന് സർക്കാർ ജീവനക്കാർക്കായി പുതിയ പെരുമാറ്റച്ചട്ടം പുറപ്പെടുവിച്ച് ജമ്മു കാഷ്മീർ ഭരണകൂടം. ജോലിസ്ഥലങ്ങളിൽ ഭീഷണിപ്പെടുത്തുന്ന രീതിയിലുള്ളതോ അധിക്ഷേപകരമായതോ ആയ ഭാഷ ഉപയോഗിക്കുന്നത് കർശനമായി വിലക്കിയാണ് ജനറൽ അഡ്മിനിസ്ട്രേഷൻ ഡിപ്പാർട്ട്മെന്‍റ് പുതിയ സർക്കുലർ ഇറക്കിയത്.
ലേബർ ആൻഡ് എംപ്ലോയ്മെന്‍റ് സെക്രട്ടറിയായ കുമാർ രാജീവ് രഞ്ജൻ മീറ്റിംഗിനിടെ തന്‍റെ കീഴുദ്യോഗസ്ഥയായ ബിനീഷ് വാണി എന്ന വനിതാ ജെകെഎഎസ് ഉദ്യോഗസ്ഥയോട് ഉദ്യോഗസ്ഥയോട് തട്ടിക്കയറുകയും മോശം വാക്കുകൾ ഉപയോഗിക്കുകയും സസ്‌പെൻഡ് ചെയ്യുമെന്ന് ഭീഷണിപ്പെടുത്തുകയും ചെയ്തു. ഇതിനെതിരെ ഉദ്യോഗസ്ഥയും ശക്തമായി പ്രതികരിച്ചു. ‘മിഷൻ യുവ’ പദ്ധതിയുടെയും നാഷണൽ റൂറൽ ലൈവ്‌ലിഹുഡ് മിഷന്‍റെയും പുരോഗതി വിലയിരുത്താൻ നടത്തിയ ഓൺലൈൻ റിവ്യൂ മീറ്റിംഗിലാണ് സംഭവം. ഇതിന്‍റെ ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ വലിയ ജനരോഷവും പ്രതിഷേധവും ഉയർന്നു.
സംഭവത്തെ തുടർന്ന് കുറ്റക്കാരനായ ഉദ്യോഗസ്ഥനെതിരെ ജമ്മു കാഷ്മീർ സർക്കാർ അന്വേഷണത്തിന് ഉത്തരവിട്ടിട്ടുണ്ട്. ഇതിനു പിന്നാലെയാണ് 1971-ലെ ജമ്മു കാഷ്മീർ ഗവൺമെന്‍റ് എംപ്ലോയീസ് പെരുമാറ്റച്ചട്ടങ്ങൾ ഓർമിപ്പിച്ചുകൊണ്ട് ഔദ്യോഗിക യോഗങ്ങളിലും ജോലിസ്ഥലത്തും മാന്യത പാലിക്കണമെന്നും മോശമായ ഭാഷ ഉപയോഗിക്കരുതെന്നും കാണിച്ച് ജമ്മു കാഷ്മീർ ജനറൽ അഡ്മിനിസ്ട്രേഷൻ ഡിപ്പാർട്ട്മെന്‍റ് പുതിയ സർക്കുലർ പുറത്തിറക്കി.
ഉദ്യോഗസ്ഥർ തങ്ങളുടെ പദവിയും മേലധികാരവും ഉത്തരവാദിത്വത്തോടും നിഷ്പക്ഷതയോടും കൂടി വിനിയോഗിക്കണമെന്നും, സഹപ്രവർത്തകരോടും കീഴുദ്യോഗസ്ഥരോടും മാന്യമായും ബഹുമാനത്തോടെയും പെരുമാറണമെന്നും സർക്കുലറിൽ വ്യക്തമാക്കുന്നു. ഉത്തരവുകൾ ലംഘിക്കുന്ന ജീവനക്കാർക്കെതിരെ കടുത്ത അച്ചടക്ക നടപടികൾ സ്വീകരിക്കുമെന്നും ഭരണകൂടം മുന്നറിയിപ്പ് നൽകി.
