സിനിമയിലെ വനിതകളുടെ സംഘടനയായ വുമണ്‍ ഇന്‍ സിനിമാ കളക്ടീവിനെ പരോക്ഷമായി പരിഹസിച്ച് സംവിധായകനും നടനുമായ ജൂഡ് ആന്റണി. ഫേസ്ബുക്കിലൂടെയായിരുന്നു ജൂഡിന്റെ പരിഹാസം. ഇവിടെ വീടിന്റെ അടുത്ത് കേബിള്‍ പണിക്കാര്‍ ഒരു പോസ്റ്റ് കുഴിച്ചു ഇന്നലെ. ഇന്ന് രാവിലെ അത് കാണാനില്ല. ഒരു പോസ്റ്റ് പോലും ഉറപ്പായി നിര്‍ത്താന്‍ അറിയാത്ത ഇവരൊക്കെ എന്ത് കേബിള്‍ ടിവി. ഇതിലും ഭേദം റേഡിയോ ആണ്.’ എന്നായിരുന്നു ജൂഡിന്റെ പോസ്റ്റ്. വിമന്‍ ഇന്‍ സിനിമ കളക്ടീവിനെ പേരെടുത്ത് പരാമര്‍ശിച്ചില്ലെങ്കിലും പരോക്ഷമായി സംഘടനയെ കളിയാക്കുന്നതാണ് പോസ്റ്റ് എന്നാണ് വിലയിരുത്തപ്പെടുന്നത്.
നേരത്തെ, കസബ വിവാദവുമായി ബന്ധപ്പെട്ട് മമ്മൂട്ടിയെ വിമര്‍ശിച്ചുകൊണ്ടുള്ള ലേഖനം ഫേസ്ബുക്കില്‍ ഷെയര്‍ ചെയ്തതിന് വിമര്‍ശനം ശക്തമായതോടെ പോസ്റ്റ് പേജില്‍ നിന്നും ഡബ്ല്യൂ.സി.സി നീക്കം ചെയ്തിരുന്നു. ഷെയര്‍ ചെയ്യപ്പെട്ട ലേഖനത്തിനെതിരെയുള്ള പ്രതികരണങ്ങള്‍ കടുത്ത ഭാഷയിലായതോടെയാണ് അവര്‍ക്ക് പോസ്റ്റ് നീക്കം ചെയ്യേണ്ടിവന്നത്. സിനിമാ മേഖലയില്‍ നിന്നുള്‍പ്പെടെയുള്ളവര്‍ വനിതാ സംഘടനയുടെ ഈ നീക്കം തരംതാഴ്ന്ന പ്രവര്‍ത്തിയായിപ്പോയെന്ന് പറഞ്ഞ് രംഗത്തുവരികയായിരുന്നു. ഒരു ഇംഗ്ലീഷ് പത്രത്തില്‍ വന്ന ലേഖനമാണ് പുതുവര്‍ഷദിവസം ആശംസകളോടൊപ്പം സ്വന്തം പേജില്‍ സംഘടന ഷെയര്‍ ചെയ്തത്.
2017 എന്നത് സിനിമാലോകത്തിന് വളരെ അര്‍ത്ഥവത്തായ വര്‍ഷമായിരുന്നു. മലയാളസിനിമയെ സംബന്ധിച്ചടത്തോളം ഒരു ഉയര്‍ത്തെഴുന്നേല്‍പ്പിന്റെ വര്‍ഷമായിരുന്നു. സ്വാതന്ത്ര്യവും ജനാധിപത്യവും തുല്യതയും ഉറപ്പുവരുത്തുന്ന രീതിയിലാകട്ടെ ആ ഉയര്‍ത്തെഴുന്നേല്‍പ്പും വിമര്‍ശനങ്ങളും ചെന്നെത്തേണ്ടതെന്ന് ഞങ്ങള്‍ ആശംസിക്കുന്നു’ ഈ അടികുറിപ്പോടെയാണ് വനിതാ സംഘടന ഫേസ്ബുക്ക് പേജില്‍ പോസ്റ്റ് ഷെയര്‍ ചെയ്തത്. ഇതോടെ പ്രേക്ഷകരും ആരാധകരും വനിതാ സംഘടനയ്‌ക്കെതിരെ രൂക്ഷ പ്രതികരണവുമായി എത്തിയിരുന്നു. ഇതിനെല്ലാം പിന്നാലെയാണ് പരസ്യ പരിഹാസവുമായി ജൂഡ് ആന്റണി രംഗത്തെത്തിയത്.
