മുംബൈ/ന്യൂഡൽഹി: ഇന്ത്യൻ പുരുഷ സീനിയർ ക്രിക്കറ്റ് ടീമിലെ ചേരിപ്പോരും പകയും കളംവിട്ട് പുറത്തേക്ക്. ക്യാപ്റ്റൻ വിരാട് കോഹ്ലിയും വൈസ് ക്യാപ്റ്റൻ രോഹിത് ശർമയും തമ്മിലുള്ള അസ്വാരസ്യം സമൂഹമാധ്യമങ്ങളിലൂടെ പുറത്തു വന്നു.
ഫോട്ടോ ഷെയറിംഗ് സമൂഹമാധ്യമമായ ഇൻസ്റ്റഗ്രാമിൽ ഇവരുടെ പിണക്കം പരസ്യമായി. ഇൻസ്റ്റഗ്രാമിൽ കോഹ്ലിയെയും അദ്ദേഹത്തിന്റെ ഭാര്യയും ബോളിവുഡ് നടിയുമായ അനുഷ്ക ശർമയെയും രോഹിത് ‘അണ്ഫോളോ’ ചെയ്തു. ഇതിനു പിന്നാലെ രോഹിത്തിനെ പറയാതെ പറഞ്ഞ് അനുഷ്കയുടെ പോസ്റ്റുമെത്തി. ഇതോടെയാണ് കോഹ്ലി – രോഹിത് ഉൾപ്പോര് വെളിപ്പെട്ടത്.
ഇന്ത്യൻ ടീം വെസ്റ്റ് ഇൻഡീസ് പര്യടനം നടത്താനിരിക്കേയാണ് ടീമിനുള്ളിലെ പ്രശ്നങ്ങൾ പുറത്തേക്കുവരുന്നത്. വിൻഡീസ് പര്യടനത്തിൽ ഏകദിനം, ട്വന്റി-20 നായകനായി രോഹിത് ശർമ വരുമെന്നും ടെസ്റ്റിൽ മാത്രമായിരിക്കും ക്യാപ്റ്റൻ കോഹ്ലി കളിക്കുക എന്നും സൂചനയുണ്ടായിരുന്നു. എന്നാൽ, മൂന്ന് ഫോർമാറ്റിലും കളിക്കാൻ തയാറാണെന്ന് കോഹ്ലി അറിയിച്ചതോടെ രോഹിത്തിന്റെ ക്യാപ്റ്റൻസി സാധ്യത അടഞ്ഞു.
ഗ്രൂപ്പിസം ടീമിലും
കോഹ്ലിയും രോഹിത്തും തമ്മിൽ പിണക്കത്തിലാണെന്നും ഇരുവരുടെയും പേരിൽ ടീമിൽ രണ്ടു ഗ്രൂപ്പുകൾ രൂപപ്പെട്ടുവെന്നുമായിരുന്നു ലോകകപ്പിനു തൊട്ടുപിന്നാലെ പുറത്തുവന്ന റിപ്പോർട്ട്.
അനുഷ്കയും റിഥികയും
രോഹിത് അണ്ഫോളോ ചെയ്തതിനുപിന്നാലെ അനുഷ്ക ഇൻസ്റ്റഗ്രാമിൽ പങ്കുവച്ച ചെറിയൊരു സന്ദേശത്തോടു കൂടിയ ചിത്രം ഇന്ത്യൻ ഓപ്പണർക്കുള്ള മറുപടിയായി വ്യാഖ്യാനിക്കപ്പെട്ടു. ജ്ഞാനികൾ അധികം സംസാരിക്കാറില്ല. തെറ്റിദ്ധാരണകൾ പെരുകുന്പോഴും നിശബ്ദത പാലിക്കാൻ സത്യത്തിനു മാത്രമേ കഴിയൂ എന്നായിരുന്നു അനുഷ്ക പങ്കുവച്ച സന്ദേശം.
കോഹ്ലി ഇപ്പോഴും ഇൻസ്റ്റഗ്രാമിൽ രോഹിത്തിനെ ഫോളോ ചെയ്യുന്നുണ്ട്. എന്നാൽ, രോഹിത്തിന്റെ ഭാര്യ റിഥികയെ കോഹ്ലി ഫോളോ ചെയ്യുന്നില്ല. അനുഷ്ക ശർമ, രോഹിത്-റിഥിക ദന്പതിമാരെയും റിഥിക, കോഹ്ലി- അനുഷ്ക ദന്പതിമാരെയും ഇൻസ്റ്റഗ്രാമിൽ ഫോളോ ചെയ്യുന്നില്ല.