ജയ്പുർ: അമേരിക്കയും പാകിസ്ഥാനും തമ്മിൽ യുദ്ധമുണ്ടായാൽ അയൽരാജ്യമെന്ന നിലയിൽ ഇന്ത്യ പാകിസ്താനൊപ്പം നിൽക്കുമെന്ന് രാജസ്ഥാൻ ബിജെപി അധ്യക്ഷൻ മദൻ റാത്തോഡ്. ജയ്പുരിൽ നടന്ന പൊതുപരിപാടിക്കിടെ നടത്തിയ പ്രസ്താവന ഇപ്പോൾ രാഷ്ട്രീയ വിവാദത്തിന് വഴിവച്ചിരിക്കുകയാണ്.
അമേരിക്കയും പാകിസ്താനും തമ്മിൽ യുദ്ധമുണ്ടായാൽ പാകിസ്താൻ ഇന്ത്യയുടെ അയൽരാജ്യമായതിനാൽ അവർക്കൊപ്പം നിൽക്കുമെന്നും, എന്നാൽ ഇന്ത്യയും പാകിസ്ഥാനും തമ്മിലുള്ള വിഷയങ്ങളിൽ ഇന്ത്യയ്ക്കൊപ്പമായിരിക്കും നിലപാടെന്നും റാത്തോഡ് പറഞ്ഞിരുന്നു.
പ്രസ്താവന പുറത്തുവന്നതോടെ കോൺഗ്രസും ആം ആദ്മി പാർട്ടിയും ബിജെപിക്കെതിരെ രൂക്ഷവിമർശനവുമായി രംഗത്തെത്തി. ഭരണകക്ഷി നേതാവിന്‍റെ പരാമർശം വലിയ രാഷ്ട്രീയ ചർച്ചകൾക്കാണ് വഴിതുറന്നത്.
അതേസമയം, തന്‍റെ വാക്കുകൾ വളച്ചൊടിച്ചതാണെന്ന് വിശദീകരിച്ച് റാത്തോഡ് രംഗത്തെത്തി. ക്രിക്കറ്റ് മത്സരവുമായി ബന്ധപ്പെട്ട് നടത്തിയ പരാമർശത്തെ തെറ്റായി വ്യാഖ്യാനിക്കുകയായിരുന്നുവെന്നാണ് അദ്ദേഹത്തിന്‍റെ വിശദീകരണം.
