ഹൃദയമില്ലായ്മയുടെ നേര്‍ക്കാഴ്ചയുമായി ഡല്‍ഹി. വാന്‍ ഇടിച്ച് പരിക്കേറ്റ സെക്യൂരിറ്റി ജീവനക്കാരന്‍ മരണത്തോട് മല്ലിട്ട് റോഡില്‍ ഒരു മണിക്കൂറില്‍ അധികം കിടന്നെങ്കിലും ആരും തിരിഞ്ഞുനോക്കിയില്ല. ഒന്നരമണിക്കൂറിനുശേഷം ആശുപത്രിയില്‍ എത്തിച്ചെങ്കിലും ഇയാള്‍ മരിച്ചു കഴിഞ്ഞതായി ഡോക്ടര്‍മാര്‍ സ്ഥിരീകരിച്ചു. വെസ്റ്റ് ഡല്‍ഹിയിലെ ഹരി നഗറിലാണ് ഹൃദയഭേദകമായ സംഭവം അരങ്ങേറിയത്.
ബംഗാള്‍ സ്വദേശിയായ 35 കാരന്‍ മതിബുള്‍ ആണ് ദാരുണമായി മരണത്തിനു കീഴടങ്ങിയത്. പരിക്കേറ്റ് ഗുരുതരാവസ്ഥയില്‍ കിടന്ന ഇയാളെ ആരും തിരിഞ്ഞുനോക്കാന്‍പോലും ശ്രമിച്ചില്ലെന്ന് സിസിടിവി ദൃശ്യങ്ങള്‍ വ്യക്തമാക്കുന്നു. ഏറ്റവും ദുഃഖകരമായ മറ്റൊരു സംഭവം പരിക്കേറ്റ് വഴിയില്‍കിടന്ന ഇയാളുടെ മൊബൈല്‍ ഫോണ്‍ റിക്ഷാ പുള്ളര്‍ മോഷ്ടിച്ചതാണ്.
സിസിടിവി ദൃശ്യങ്ങള്‍ പുറത്തുവന്നതോടെ പോലീസ് അന്വേഷണം ഊര്‍ജിതമാക്കിയിട്ടുണ്ട്. ഇയാളെ ഇടിച്ചിട്ട വാഹനവും മൊബൈല്‍ മോഷ്ടിച്ച ആളെയും പിടികൂടാനുള്ള ശ്രമത്തിലാണ് പോലീസ്.
