വരാപ്പുഴ: കൈതാരത്ത് സ്‌കൂള്‍ വിദ്യാര്‍ഥിനി അമ്മയായി. കാമുകനായ 23കാരന്‍ ഒളിവിലാണ്. താന്‍ ഗര്‍ഭിണിയാണെന്ന വിവരം പ്ലസ് വണ്‍ വിദ്യാര്‍ഥിനിയായ പെണ്‍കുട്ടി വീട്ടുകാരില്‍ നിന്ന് മറച്ചു വയ്ക്കുകയായിരുന്നു.വയറുവേദനയും ചര്‍ദ്ദിയും അനുഭവപ്പെട്ടതിനെ തുടര്‍ന്ന് പല പ്രാവശ്യം അടുത്തുള്ള ഹോമിയോ ഡോക്ടറുടെ അടുത്ത് കൊണ്ടു പോയിരുന്നുവെങ്കിലും അന്നൊന്നും ഇക്കാര്യം ആരും അറിഞ്ഞില്ല.
എന്നാല്‍ അടുത്തിടെ പെണ്‍കുട്ടിയ്ക്കു കടുത്ത വയറുവേദന അനുഭവപ്പെട്ടപ്പോള്‍ വീട്ടുകാര്‍ ആശുപത്രിയില്‍ എത്തിക്കുകയായിരുന്നു. അപ്പോഴാണ് പെണ്‍കുട്ടി ഗര്‍ഭിണിയാണെന്ന വിവരം വീട്ടുകാര്‍ അറിയുന്നത്. ഒരാഴ്ച മുമ്പ് വീട്ടിലാണ് പെണ്‍കുട്ടി പ്രസവിച്ചത്. തുടര്‍ന്ന് ശിശുഭവനിലേക്ക് മാറ്റിയ പെണ്‍കുട്ടിയെ വിദഗ്ദ്ധ ചികിത്സയ്ക്കായി എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
ചൈല്‍ഡ് ലൈനും ചൈല്‍ഡ് വെല്‍ഫെയര്‍ കമ്മിറ്റിയും വിവരം അറിയിച്ചതിനെ തുടര്‍ന്ന് പറവൂര്‍ പോലീസ് കേസെടുത്തു. അയല്‍വാസിയായ യുവാവിനെതിരേ പോലീസ് അന്വേഷണം ആരംഭിച്ചിട്ടുണ്ട്.
പെണ്‍കുട്ടിയും കുഞ്ഞും ഇപ്പോള്‍ ചൈല്‍ഡ് വെല്‍ഫെയര്‍ കമ്മിറ്റിയുടെ സംരക്ഷണത്തിലാണ്. 96 ശതമാനത്തിലേറെ മാര്‍ക്ക് വാങ്ങിയാണ് പെണ്‍കുട്ടി എസ്എസ്എല്‍സി പരീക്ഷയില്‍ വിജയിച്ചത്. ചേട്ടനെ ഒന്നും ചെയ്യരുതെന്നു മാത്രമാണ് പെണ്‍കുട്ടി പറയുന്നതെന്നും കൂടുതലായി എന്തെങ്കിലും പറയാന്‍ പെണ്‍കുട്ടി തയ്യാറാകുന്നില്ലെന്നും ചൈല്‍ഡ് വെല്‍ഫെയര്‍ കമ്മിറ്റി ചെയര്‍പേഴ്സണ്‍ പദ്മജ നായര്‍ പറഞ്ഞു. അന്വേഷണം നടക്കുകയാണെന്ന് പറവൂര്‍ സര്‍ക്കിള്‍ ഇന്‍സ്‌പെക്ടര്‍ കെ. അനില്‍കുമാര്‍ പറഞ്ഞു.
