യുഎസ്: ആറ് വയസുള്ള മകനെ സൂപ്പർമാർക്കറ്റിൽ വച്ച് മറ്റൊരു സ്ത്രീക്ക് അമ്മ വിറ്റു. കുട്ടിയുടെ ദേഹത്ത് ബാധ കൂടിയെന്നും തന്‍റെ മറ്റു മക്കളെ ആക്രമിക്കുമെന്നും പറഞ്ഞാണ് അമ്മ കുട്ടിയെ വിറ്റത്.
ടെക്സാസിലാണ് സംഭവം നടന്നത്. കഴിഞ്ഞ മാസം ആറുവയസുകാരനെ കാണാതായിരുന്നു. തുടർന്നു നടത്തിയ അന്വേഷണത്തിലാണ് അവന്‍റെ അമ്മയായ സിൻഡി റോഡ്രിഗസ് മകനെ വിറ്റതായി കണ്ടെത്തിയത്.
കുട്ടി അമ്മയുടെയും രണ്ടാനച്ഛന്‍റെയും കൂടെയാണ് കഴിഞ്ഞിരുന്നത്. അതിനിടെ സിൻഡി റോഡ്രിഗസിന് ഇരട്ടക്കുട്ടികൾ പിറന്നു.
ആറ് വയസുകാരനായ മകന് ബാധ പിടികൂടിയിരിക്കുകയാണെന്നും അവൻ ഇരട്ടക്കുട്ടികളെ ഉപദ്രവിക്കും എന്നും അമ്മ വിശ്വസിച്ചു.
കുട്ടിയെ കാണാതായതുമായി ബന്ധപ്പെട്ട് അന്വേഷണം നടന്നപ്പോൾ കുട്ടി അവന്‍റെ അച്ഛനൊപ്പം ഉണ്ടായിരിക്കുമെന്നാണു സ്ത്രീ പറഞ്ഞിരുന്നത്. എന്നാൽ, ഇവരുടെ അടുത്ത ബന്ധു, കുട്ടിയെ വിറ്റതായി വെളിപ്പെടുത്തുകയായിരുന്നു.
സിൻഡി കുട്ടിയെ ഉപദ്രവിച്ചിരുന്നു എന്നും അവന് പലപ്പോഴും വെള്ളവും ഭക്ഷണവും നിഷേധിച്ചിരുന്നുവെന്നും ബന്ധു ആരോപിച്ചു.
പരാതി ഉയർന്നതിനു പിന്നാലെ സിൻഡിയും രണ്ടാം ഭർത്താവും കുട്ടികൾക്കൊപ്പം ഇന്ത്യയിലേക്ക് കടന്നു. കുട്ടിയെയും ദമ്പതികളെയും കണ്ടെത്താനുള്ള ശ്രമം നടക്കുകയാണെന്നു മാധ്യമങ്ങൾ റിപ്പോർട്ട് ചെയ്തു.
