പത്തനംതിട്ട: കൃഷിയിടങ്ങളിൽ സാധാരണയായി കൃഷിചെയ്യപ്പെടുന്നതും, പോഷകമൂല്യങ്ങളുടെ സമൃദ്ധിയുള്ളതുമായ മത്തങ്ങയിൽ നിന്നും മൂല്യവർധിത ഉത്പന്നങ്ങളുമായി ജില്ലാ കൃഷി വിജ്ഞാന കേന്ദ്രം. മത്തങ്ങയ്ക്കു പലപ്പോഴും വിപണിയിൽ ന്യായമായ വില ലഭിക്കാത്ത സാഹചര്യത്തിലാണ്, അതിന് ശാസ്ത്രീയമായ മൂല്യവർധനയിലൂടെ പത്തനംതിട്ട ജില്ലാ കൃഷി വിജ്ഞാന കേന്ദ്രം പുതിയ സാധ്യതകൾ തുറക്കുന്നത്.
വിളവെത്തിയ മത്തങ്ങയിൽ നിന്നാണ് കൃത്രിമ നിറങ്ങളോ രുചികളോ പ്രിസർവേറ്റീവുകളോ ഒന്നും ചേർക്കാതെ റെഡി ടു ഈറ്റ് ഹെൽത്തി സ്നാക്ക് രൂപകൽപന ചെയ്തത്. താരതമ്യേന ഉയർന്ന അളവിലുള്ള നാരുകൾ, ധാതുലവണങ്ങൾ, ബീറ്റാ-കരോട്ടിൻ പോലുള്ള ആന്റി ഓക്സിഡന്റ് ഘടകങ്ങൾ എന്നിവയുടെ സാന്നിധ്യം മത്തങ്ങയെ ആരോഗ്യ സൗഹൃദ ഭക്ഷ്യവിഭാഗത്തിൽ പ്രത്യേക സ്ഥാനത്തേക്ക് ഉയർത്തുന്നു.
മത്തങ്ങയുടെ തനത് പോഷകഗുണങ്ങൾ നഷ്ടപ്പെടാതെ തന്നെ ആധുനിക ഡ്രയറുകൾ ഉപയോഗിച്ച് ഉണക്കി, ഡ്രൈഡ് ഫ്രൂട്ട് വിഭാഗത്തിൽ ഉൾപ്പെടുത്താവുന്ന രീതിയിൽ ഉത്പന്നമാക്കി മാറ്റാൻ കഴിഞ്ഞത് ഈ സംരംഭത്തിന്റെ പ്രധാന സവിശേഷതയാണ്. കൃഷി വിജ്ഞാന കേന്ദ്രത്തിലെ സംരംഭകത്വ സഹായ കേന്ദ്രമായ ന്യൂട്രി ഹബ് മുഖേന ഉത്പന്നം ലഭ്യമാക്കിയിട്ടുണ്ട്.
മത്തങ്ങയ്ക്ക് മൂല്യവർധന സാങ്കേതികവിദ്യ വികസിപ്പിക്കുന്നതിൽ കെവികെ പത്തനംതിട്ടയിലെ ഡോ. ഷാന ഹർഷൻ, സബ്ജക്ട് മാറ്റർ സ്പെഷ്യലിസ്റ്റ് (ഹോം സയൻസ്) നിർണായക പങ്ക് വഹിച്ചതായി കൃഷി വിജ്ഞാന കേന്ദ്രം അറിയിച്ചു. പച്ചക്കറികളിൽ നിന്നുള്ള റെഡി ടു ഈറ്റ് ഹെൽത്തി സ്നാക്കുകളുടെ നിർമാണത്തിനായുള്ള വിവിധ പരീക്ഷണങ്ങളും വികസന പ്രവർത്തനങ്ങളും കൃഷി വിജ്ഞാന കേന്ദ്രയിൽ പുരോഗമിച്ചുവരികയാണ്.
പഴവർഗ സംസ്കരണത്തോടൊപ്പം തന്നെ പച്ചക്കറികളുടെ സംസ്കരണത്തിനും മൂല്യവർധനയ്ക്കും തുല്യ പ്രാധാന്യം നൽകേണ്ടതുണ്ടെന്നും ഇത്തരം പ്രവർത്തനങ്ങൾ കർഷകരുടെ ഉത്പന്നങ്ങൾക്ക് ന്യായമായ വില ലഭിക്കുന്നതിനും ഗ്രാമീണ സംരംഭകത്വം ശക്തിപ്പെടുത്തുന്നതിനും സഹായകമാകുമെന്നും കെവികെ പത്തനംതിട്ടയുടെ മേധാവിയും സീനിയർ സയന്റിസ്റ്റുമായ ഡോ. സി. പി. റോബർട്ട് അറിയിച്ചു.
