സ്വകാര്യ ആശുപത്രികളിൽ ഒരു രോഗി ചെന്നാൽ ഇല്ലാത്ത ടെസ്റ്റുകളെല്ലാം ചെയ്യിപ്പിച്ച് കാശ് ഊറ്റുമെന്നാണ് പൊതുവെയുള്ളൊരു സംസാരം. ഏറെക്കുറെയൊക്കെ അത് സത്യമെന്ന് തെളിയിക്കുന്നൊരു വീഡിയോ ആണിപ്പോൾ സോഷ്യൽ മീഡിയയിൽ വൈറലാകുന്നത്.
ജോലിക്ക് കയറിയ ആദ്യ ദിവസംതന്നെ ജോലി രാജിവച്ച് യുവ ഡോക്ടർ. ഇതിന്റെ കാരണം കേട്ടാൽ ആരായാലും അതിശയിക്കും. ഇന്റേണൽ മെഡിസിൻ സ്പെഷ്യലിസ്റ്റ് ഡോ. പ്രഭ്ലീൻ കൗർ ആണ് ജോലി രാജി വച്ചത്. സ്വകാര്യ ആശുപത്രി രോഗികളെ കൊള്ളയടിക്കുന്നത് കണ്ട് ആശങ്കപ്പെട്ടിട്ടാണ് യുവ ഡോക്ടറുടെ രാജി. ഇത് വിശദീകരിക്കുന്ന വീഡിയോ ഇവർ സോഷ്യൽ മീഡിയയിൽ പങ്കുവച്ചു. ഇതോടെ രോഗികളുടെ സുരക്ഷയെ കുറിച്ചും മെഡിക്കൽ ധാർമ്മികതയെ കുറിച്ചും വലിയ ചർച്ചകൾ ഉണ്ടായി.
സ്വകാര്യ ലാഭത്തിനായി രോഗികളെ അനാവശ്യമായി അഡ്മിറ്റ് ചെയ്യുകയും ഐസിയുവിൽ കിടത്തുകയും ചെയ്യുന്നു എന്ന് ഡോക്ടർ ആരോപിച്ചു. ചണ്ഡീഗഢിൽ ഒരു മുതിർന്ന ഗൈനക്കോളജിസ്റ്റിന്റെ ഉടമസ്ഥതയിലുള്ളതാണ് ആശുപത്രി എന്ന് മാത്രമാണ് ഡോ. പ്രഭ്ലീൻ കൗർ ആശുപത്രിയെ കുറിച്ച് നൽകുന്ന വിവരം.
വീഡിയോ എന്തായാലും വലിയ ചർച്ചകൾക്ക് വഴി തെളിയിച്ചു. ഡോക്ടർമാർ പോലും കള്ളന്മാരാണെന്നാണ് പലരും വീഡിയോ കണ്ടിട്ട് അഭിപ്രായപ്പെട്ടത്.
