ഡെറാഡൂൺ: ഹല്ദ്വാനിയിലെ ശുദ്ധീകരണ വിവാദത്തിന് പിന്നാലെ ലോക്സഭാ പ്രതിപക്ഷനേതാവ് രാഹുല് ഗാന്ധിക്കെതിരെ കേസെടുത്തു. ഉത്തരാഖണ്ഡ് പോലീസാണ് കേസെടുത്തത്.
മതപരമായ ചടങ്ങിന് രാഹുല് ഗാന്ധി ജാതീയമായ വ്യാഖ്യാനം നല്കിയെന്ന് ആരോപിച്ചാണ് കേസ്. വാല്മീകി സമുദായത്തില്പ്പെട്ട അമിത് കുമാര് നല്കിയ പരാതിയില് ആണ് കേസ്.
ബിഎൻഎസിലെ 196, 299 എസ്സി / എസ് ടി നിയമത്തിലെ 3 (1) (Q) എന്നീ വകുപ്പുകള് പ്രകാരമാണ് കേസ്. കോൺഗ്രസ് അധ്യക്ഷൻ മല്ലികാര്ജുന് ഖാര്ഗെയുടെ വേദിയില് ശുദ്ധീകരണം നടത്തിയവര്ക്ക് എതിരെ കേസ് എടുക്കാന് പ്രധാനമന്ത്രിയോട് രാഹുല് ആവശ്യപ്പെട്ടിരുന്നു. ഇതിന് പിന്നാലെയാണ് രാഹുലിന് എതിരായ കേസ്.
ശുദ്ധീകരണ വിവാദത്തെ ചൊല്ലി എന്ഡിഎയില് ഭിന്നതയുണ്ട്. വിഷയം ആശങ്ക ഉണര്ത്തുന്നതാണെന്ന് വ്യക്തമാക്കി കേന്ദ്രമന്ത്രി ചിരാഗ് പാസ്വാന് ഇന്നലെ രംഗത്തെത്തിയിരുന്നു. കൂടാതെ ഇപ്പോഴും സാമൂഹ്യ സാഹചര്യങ്ങള് മാറാതിരിക്കുന്നത് സര്ക്കാരിനും ആശങ്ക ഉണ്ടാക്കുന്നതാണെന്നും കേന്ദ്രമന്ത്രി വ്യക്തമാക്കി.
