ഒരു കാലത്ത് മലയാള സിനിമയിലെ റൊമാന്റിക് ഹീറോയായിരുന്ന താരമാണ് ശങ്കര്‍. താരരാജാവ് മോഹന്‍ലാലിന്റെ അരങ്ങേറ്റ ചിത്രം മഞ്ഞില്‍ വിരിഞ്ഞ പൂക്കളില്‍ നായകന്‍ ശങ്കറായിരുന്നു. മലയാളത്തില്‍ നായകനായി ശങ്കറിന്റെ ആദ്യ ചിത്രമായിരുന്നു അത്.
എന്നാല്‍ ആ ചിത്രത്തിലെ നായകന്‍ പിന്നീട് സിനിമയില്‍ വലിയ പേരല്ലാതാകുന്നതും വില്ലന്‍ രാജ്യം കണ്ട മികച്ച താരങ്ങളിലൊരാളായി വളരുന്നതിനുമാണ് മലയാള സിനിമ സാക്ഷ്യം വഹിച്ചത്.
മഞ്ഞില്‍ വിരിഞ്ഞ പൂക്കളിനു ശേഷം നിരവധി സിനിമകളില്‍ പ്രണയ നായകനായും നിരാശാ കാമുകനായും ഒക്കെ അഭിനയിച്ച ശങ്കറിന് പക്ഷേ ഒരു സൂപ്പര്‍താരമായി ഉയരാന്‍ കഴിഞ്ഞിരുന്നില്ല.
അതേ സമയം മലയാള സിനിമയില്‍ മോഹന്‍ലാല്‍ എന്ന സൂപ്പര്‍ താരത്തിന്റെ വളര്‍ച്ച മറ്റൊരു നടന്റെ തളര്‍ച്ചയ്ക്ക് കാരണമായി എന്ന് പൊതുവേ പറയാറുണ്ട്.
കരിയറിന്റെ തുടക്കകാലത്ത് മോഹന്‍ലാല്‍ വില്ലന്‍ വേഷങ്ങള്‍ ചെയ്യുമ്പോള്‍ ആ സിനിമകളിലൊക്കെ നായകനായി തിളങ്ങിയിരുന്ന നടനായിരുന്നു ശങ്കര്‍.
പക്ഷേ ശങ്കര്‍ എന്ന നടന് മലയാളത്തിലെ ഒരു സൂപ്പര്‍ സ്റ്റാര്‍ ആയി ഉയര്‍ന്നു വരാനുള്ള ഭാഗ്യം സിദ്ധിച്ചില്ല. തനിക്കൊപ്പം സിനിമയിലെത്തിയ മോഹന്‍ലാല്‍ സൂപ്പര്‍ താരമായി മുന്നേറുകയും തനിക്ക് സൂപ്പര്‍താര ഇമേജ് എന്തുകൊണ്ട് സൃഷ്ടിക്കാന്‍ കഴിയാതെ പോയി എന്നതിനെക്കുറിച്ചും ഇപ്പോള്‍ തുറന്നു പറയുകയാണ് ശങ്കര്‍.
ഒരു ഓണ്‍ലൈന്‍ ചാനലിനു നല്‍കിയ അഭിമുഖത്തില്‍ ആയിരുന്നു ശങ്കറിന്റെ തുറന്നു പറച്ചില്‍. ശങ്കറിന്റെ വാക്കുകള്‍ ഇങ്ങനെ…മോഹന്‍ലാല്‍ ചെയ്തത് പോലെ വ്യത്യസ്തമായ വേഷങ്ങള്‍ എനിക്ക് ലഭിച്ചില്ല.
എന്റെ സ്ഥിരം ഇമേജില്‍ നിന്ന് മാറാന്‍ വേണ്ടി ആക്ഷന്‍ സിനിമകള്‍ ഞാന്‍ സംവിധായകരോട് ചോദിച്ചു വാങ്ങിയിട്ടുണ്ട്. പ്രിയദര്‍ശന്റെ പറയാനും വയ്യ പറയാതിരിക്കാനും വയ്യ എന്ന സിനിമയൊക്കെ അങ്ങനെ ചെയ്തതാണ്.
ഞാനും മോഹന്‍ലാലും തമ്മില്‍ നിരവധി സംഘട്ടന രംഗങ്ങളില്‍ അഭിനയിച്ചിട്ടുണ്ട്. മോഹന്‍ലാല്‍ ആക്ഷന്‍ സിനിമ ചെയ്യുമ്പോള്‍ തന്നെ ഹ്യൂമറൊക്കെ അതി മനോഹരമായി ചെയ്യുമായിരുന്നു. മോഹന്‍ലാലിന്റെ സിനിമകളൊക്കെ സൂപ്പര്‍ ഹിറ്റാവുകയും ചെയ്തു.
ഞാന്‍ മഞ്ഞില്‍ വിരിഞ്ഞ പൂക്കള്‍ എന്ന സിനിമയില്‍ കണ്ട അതേ ലാലാണ് ഇത്രയും വര്‍ഷം സൂപ്പര്‍ താരമായി എന്റെ മുന്നില്‍ നില്‍ക്കുമ്പോഴും കാണുന്നത്.
സ്വഭാവത്തില്‍ യാതൊരു മാറ്റവുമില്ല. അന്നും ഇന്നും ഒരേ പോലെ പെരുമാറുന്ന വ്യക്തിത്വമാണ് മോഹന്‍ലാലിന്റേതെന്നും ശങ്കര്‍ വ്യക്തമാക്കുന്നു.
