നീലച്ചിത്ര നിര്‍മാണത്തിന് അറസ്റ്റിലായ ഭര്‍ത്താവ് രാജ് കുന്ദ്രയെ കൈയ്യൊഴിഞ്ഞ് ഭാര്യ ശില്‍പ ഷെട്ടി. ഭര്‍ത്താവിന്റെ ബിസിനസുമായി തനിക്ക് യാതൊരു ബന്ധവുമില്ലെന്നായിരുന്നു ശില്‍പ പോലീസിനു നല്‍കിയ മൊഴി.
രാജിന്റെ ബിസിനസ് എന്തായിരുന്നുവെന്നു പോലും തനിക്കറിയില്ലായിരുന്നുവെന്നാണ് ശില്‍പ പറയുന്നത്. രാജ് കുന്ദ്രയ്‌ക്കെതിരേ പോലീസ് സമര്‍പ്പിച്ച 1400 പേജ് കുറ്റപത്രത്തില്‍ ബോളിവുഡ് അഭിനേത്രി കൂടിയായ ശില്പാ ഷെട്ടിയേയും സാക്ഷിയായി ഉള്‍പ്പെടുത്തിയിട്ടുണ്ട്.
തന്റെ അഭിനയ ജീവിതവുമായി വളരെ തിരക്കിലായിരുന്നുവെന്നും അതിനാല്‍ ഭര്‍ത്താവിന്റെ ജോലി എന്തായിരുന്നുവെന്ന് ശ്രദ്ധിക്കാന്‍ സാധിച്ചില്ലെന്നും ശില്പാ ഷെട്ടി പോലീസിനു നല്‍കിയ മൊഴിയില്‍ പറയുന്നു.
നീലചിത്രങ്ങള്‍ പ്രദര്‍ശിപ്പിക്കാന്‍ ഉപയോഗിച്ചിരുന്ന ഹോട്ട്‌ഷോട്ട്‌സ്, ബോളിഫേം എന്നീ ആപ്പുകളെ കുറിച്ചും തനിക്ക് അറിവില്ലായിരുന്നുവെന്ന് ശില്പാ ഷെട്ടി പറഞ്ഞു.
കഴിഞ്ഞ ജൂലായ് 19നാണ് രാജ് കുന്ദ്രയേയും കൂട്ടാളികളേയും നീലച്ചിത്ര നിര്‍മാണത്തിന് മുംബൈ പോലീസ് അറസ്റ്റ് ചെയ്യുന്നത്. ഇതില്‍ നാലു പേര്‍ അന്വേഷണ സമയത്തു തന്നെ രാജ് കുന്ദ്രയ്‌ക്കെതിരായി മൊഴി നല്‍കിയിരുന്നു. ഇവരെ കേസില്‍ മാപ്പുസാക്ഷികളാക്കുമെന്ന് കരുതുന്നു.
അതേസമയം താന്‍ നിര്‍മ്മിച്ചവ ലൈംഗികതയുടെ അതിപ്രസരമുള്ള ചിത്രങ്ങളായിരുന്നില്ലെന്നും മറിച്ച് നെറ്റ്ഫ്‌ളിക്‌സ് പോലുള്ള ഒടിടി പ്ലാറ്റഫോമുകളില്‍ കാണുന്ന സ്‌നേഹപ്രകടനങ്ങള്‍ മാത്രമായിരുന്നു അവയിലുണ്ടായിരുന്നതെന്നും രാജ് കുന്ദ്ര കോടതിയില്‍ വാദിച്ചിരുന്നു.
