ഭൗമ ദിനത്തില് നടി ശില്പ ഷെട്ടി സോഷ്യല് മീഡിയയില് പങ്കുവച്ച കുറിപ്പ് ശ്രദ്ധനേടുന്നു. തിരക്കേറിയ ജീവിതത്തിനിടയില് പ്രകൃതിയിലേക്കു മടങ്ങാനും മണ്ണുമായും പരിസ്ഥിതിയുമായും മാനസികമായി ഒന്നാകാനുമാണ് താരം ഓര്മിപ്പിക്കുന്നത്. പ്രകൃതിയുമായി അടുത്ത് ഇടപഴകുന്നത് മനസിനും ശരീരത്തിനും നല്കുന്ന ഊര്ജത്തെക്കുറിച്ചും നടി കുറിപ്പില് പങ്കുവയ്ക്കുന്നു. ഭൂമിയുടെ സംരക്ഷണത്തിനായും പ്രകൃതിയെ സ്നേഹിക്കുന്നതിനായും എല്ലാവരെയും പ്രേരിപ്പിക്കുകയാണ് ഈ സന്ദേശത്തിലൂടെ അവര് ചെയ്യുന്നത്.
വീടിന്റെ മുറ്റത്തെ പുല്ത്തകിടിയിലൂടെ നഗ്നപാദയായി പതുക്കെ നടക്കുന്ന വീഡിയോയ്ക്കൊപ്പമായിരുന്നു ശില്പ്പയുടെ കുറിപ്പ്. ഭൗമദിനത്തിലും മറ്റ് എല്ലാ ദിവസങ്ങളിലും നഗ്നപാദരായി മണ്ണില് നടന്ന് സ്വയം ഭൂമിയുമായി ബന്ധപ്പെടാന് ഒരു ചെറിയ ഓര്മപ്പെടുത്തല്. ഭൂമിയുടെ ഊര്ജം നിങ്ങളെ സുഖപ്പെടുത്തുകയും പുനരുജ്ജീവിപ്പിക്കയും ചെയ്യട്ടെ.
പ്രകൃതിയുമായി വീണ്ടും ബന്ധപ്പെടുക. ചര്മത്തില് സൂര്യപ്രകാശവും പാദങ്ങള്ക്കുതാഴെ മണ്ണും പക്ഷികളുടെ കലപിലയും കാറ്റിന്റെ തലോടലുമൊക്കെ അനുഭവിക്കുക. കാരണം ഭൂമിയെ സ്പര്ശിക്കുമ്പോള് നിങ്ങള് ആരാണെന്ന് നിങ്ങള് വീണ്ടും ഓര്മിക്കുന്നു… എന്നാണ് വീഡിയോയ്ക്കൊപ്പം ശില്പ്പ കുറിച്ചത്.
താരത്തിന്റെ വീഡിയോയും കുറിപ്പും ആരാധകര്ക്കിടയില് ഇതിനകം ചര്ച്ചയായിക്കഴിഞ്ഞു. യോഗ, ആരോഗ്യകരമായ ഭക്ഷണം, മനഃസാന്നിധ്യം എന്നിവ പ്രോത്സാഹിപ്പിക്കുന്ന ശില്പ ഇത്തരം വെല്നസ് ടിപ്പുകള് പതിവായി തന്റെ സോഷ്യല് മീഡിയ വഴി പങ്കുവയ്ക്കാറുണ്ട്.
