കൊച്ചി: പ്രമുഖ ചലച്ചിത്ര നിര്‍മാതാവും വിതരക്കാരനുമായ സിറാജ് വലിയവീട്ടില്‍ അന്തരിച്ചു. അറുപത് വയസായിരുന്നു. ഹൃദയസ്തംഭനംമൂലം കൊച്ചിയിലെ സ്വകാര്യ ആശുപത്രിയില്‍ ഇന്നു പുലർച്ചെ 3.30 ഓടെയായിരുന്നു അന്ത്യം. രാജമാണിക്യം, പ്രജാപതി, അപരിചിതന്‍ തുടങ്ങിയ നിരവധി സിനിമകളുടെ നിര്‍മാതാവായിരുന്ന അദ്ദേഹത്തെ ഇന്നലെ വൈകുന്നേരമായിരുന്നു ആശുപത്രിയില്‍ പ്രവേശിപ്പിച്ചത്. കബറടക്കം ഇന്നു വൈകുന്നേരം 3.30ന് കൊച്ചി നോര്‍ത്ത് എസ്ആര്‍എം റോഡിലെ തോട്ടതുംപ്പടി ജുമാ മസ്ജിദ് ഖബര്‍സ്ഥാനില്‍ നടക്കും.
ഭാര്യ: ഹദീജ സിറാജ്. മക്കള്‍: വി. സിനിക്, സിന്‍സി, മുംതാസ്. മരുമകള്‍: റെസി സിനിക്. മമ്മൂട്ടി നായകനായ അപരിചിതനായിരുന്നു അദ്ദേഹം നിർമിച്ച ആദ്യസിനിമ. പ്രമുഖ ബിസിനസുകാരനും ഫൈനാന്‍സിയറുമായിരുന്ന അദ്ദേഹം എറണാകുളം മാര്‍ക്കറ്റ് റോഡിലെ വലിയവീട്ടില്‍ ചിട്ടി ഫണ്ടിന്റെ മാനേജിംഗ് ഡയറക്ടറും കൂടിയായിരുന്നു.
