കുമരകം: പട്ടാപ്പകൽ കോഴിക്കൂടിനുള്ളിൽ കയറിയ മൂർഖൻ പാമ്പ് സർപ്പ വോളണ്ടിയർ സംഘം എത്തുന്നതിന് മുമ്പ് പിടികൊടുക്കാതെ രക്ഷപ്പെട്ടു. കുമരകം അഞ്ചാം വാർഡിൽ വിത്തുവട്ടിൽ ഫിലിപ്പ് വി. കുര്യന്റെ വീടിനു സമീപത്തെ കോഴിക്കൂട്ടിൽ കയറിയ മൂർഖനാണ് പിടികൊടുക്കാതെ മുങ്ങിയത്. കോഴിക്കൂടിനുള്ളിൽ തീറ്റയും വെള്ളവും കൊടുക്കാൻ വച്ചിരുന്ന ബോക്സിനുള്ളിലാണ് മൂർഖൻ പ്രത്യക്ഷപ്പെട്ടത്.
ഇന്നലെ ഉച്ചകഴിഞ്ഞ് മൂന്നിന് വീട്ടമ്മ ഷേർലി ഫിലിപ്പ് കോഴികളുടെ അസാധാരണ ശബ്ദം കേട്ടെത്തിയപ്പോഴാണ് ബോക്സിനുള്ളിൽ പത്തിവിടർത്തി നില്ക്കുന്ന മൂർഖനെ കണ്ടത്. ഉടൻതന്നെ സർപ്പ വോളണ്ടിയറെ വിവരം അറിയിച്ചു.
എന്നാൽ കോട്ടയത്തുനിന്നു സ്നേക്ക് റെസ്ക്യു ടീം എത്തുന്നതിനു മുമ്പുതന്നെ മൂർഖൻ സ്ഥലം വിട്ടു. ഇതോടെ വീട്ടുകാർ ഭയാശങ്കയിലാണ്. കൊടുചൂടും തണ്ണീർമുക്കം ബണ്ടിന്റെ ഷട്ടറുകൾ തുറന്നതോടെ കൊയ്ത്ത് കഴിഞ്ഞ പാടശേഖരങ്ങളിൽ ഉപ്പുവെള്ളം കയറിയതും പാമ്പുകൾ വ്യാപകമായി മാളം വിട്ടിറങ്ങാൻ കാരണമായി.
