ജോലി ഉപേക്ഷിച്ച് സ്വന്തമായി എന്തെങ്കിലും ചെയ്യാൻ തുടങ്ങിയ ജയ്പൂർ സ്വദേശിയായ മുൻ ജീവനക്കാരന്, രണ്ട് വർഷങ്ങൾക്ക് ശേഷം മുൻ ബോസിൽ നിന്ന് ലഭിച്ച അപ്രതീക്ഷിതവും രസകരവുമായ ഇമെയിൽ സമൂഹമാധ്യമങ്ങളിൽ വൈറലാകുന്നു. റെഡിറ്റിലാണ് ഇയാൾ ഇതിന്‍റെ സ്ക്രീൻഷോട്ട് പങ്കുവെച്ചത്.
രണ്ട് വർഷം മുമ്പ് ജീവനക്കാരൻ ജോലി രാജി വെച്ചപ്പോൾ അദ്ദേഹം ചെയ്തത് തെറ്റാണെന്ന് പറഞ്ഞ ബോസ്, ഭാവിയിൽ എപ്പോഴെങ്കിലും തിരിച്ചുവരാൻ ആഗ്രഹിച്ചാൽ കമ്പനിയുടെ വാതിലുകൾ എപ്പോഴും തുറന്നിരിക്കുമെന്ന് പറഞ്ഞിരുന്നു. എന്നാൽ ദിവസങ്ങൾക്ക് മുമ്പ് ജീവനക്കാരന്‍റെ ലിങ്ക്ഡ്ഇൻ പോസ്റ്റ് കണ്ട ബോസ്, കാര്യങ്ങൾ ഇത്രയും നന്നായി മുന്നോട്ടുപോകുന്നത് കണ്ട് അത്ഭുതപ്പെടുകയും സന്തോഷിക്കുകയും ചെയ്തു.
തുടർന്ന് അദ്ദേഹം അയച്ച ഇമെയിലിന്‍റെ അവസാന വരികളാണ് ഏറെ ശ്രദ്ധിക്കപ്പെട്ടത്: “അതുകൊണ്ട് തന്നെ ആ വാതിലുകൾ ഇപ്പോൾ ഔദ്യോഗികമായി അടഞ്ഞിരിക്കുകയാണെന്ന് അറിയിക്കാൻ ഞാൻ ആഗ്രഹിക്കുന്നു :)”
എന്നാൽ കമ്പനി ഇനി ജോലിക്ക് തിരിച്ചെടുക്കില്ല എന്ന അർഥത്തിലല്ല, മറിച്ച് ജീവനക്കാരന് ഇനി ഒരിക്കലും അത്തരമൊരു തിരിച്ചുപോകലിന്‍റെ ആവശ്യം വരില്ല എന്ന് താൻ പ്രതീക്ഷിക്കുന്നു എന്നാണ് ആ ബോസ് അതിലൂടെ വ്യക്തമാക്കിയത്. “നിങ്ങൾക്ക് എല്ലാവിധ ആശംസകളും നേരുന്നു, വളർച്ച തുടരുക!” എന്ന് പറഞ്ഞാണ് അദ്ദേഹം കത്ത് അവസാനിപ്പിച്ചത്.
റെഡിറ്റിൽ പങ്കുവെക്കപ്പെട്ട ഈ പോസ്റ്റിന് താഴെ നിരവധി പേരാണ് അനുകൂലമായ കമന്‍റുകളുമായി എത്തിയത്. മുൻ ബോസിന്‍റെ ആ വാക്കുകൾ അദ്ദേഹത്തിന്‍റെ വളർച്ചയിലെ സന്തോഷവും പിന്തുണയുമാണ് കാണിക്കുന്നതെന്നും, പഴയ ജോലിയിലേക്ക് മടങ്ങേണ്ടി വരരുതേ എന്നുള്ള ആത്മാർഥമായ ആശംസയാണ് അതെന്നും ഉപയോക്താക്കൾ അഭിപ്രായപ്പെട്ടു.
