മഹാരാഷ്ട്രയിലെ വാർധ ജില്ലയിൽ വൈദ്യപരിശോധനയ്ക്കായി കൊണ്ടുവന്ന പ്രതി പൊലീസുകാരുടെ മുന്നിൽ വെച്ച് വനിതാ ഡോക്ടറുടെ മുഖത്തടിച്ചു. വാർധയിലെ തലേഗാവ് ശ്യാംജിപന്ത് പ്രൈമറി ഹെൽത്ത് സെന്‍ററിലാണ് നടുക്കുന്ന സംഭവം നടന്നത്. ഇതിന്‍റെ സിസിടിവി ദൃശ്യങ്ങൾ സമൂഹമാധ്യമങ്ങളിൽ വൈറലായി.
ഒരു കേസുമായി ബന്ധപ്പെട്ട് വൈദ്യപരിശോധനയ്ക്കായി പൊലീസാണ് പ്രതിയെ ആരോഗ്യ കേന്ദ്രത്തിൽ എത്തിച്ചത്. പരിശോധനകൾ പൂർത്തിയായി ഡോക്ടർ രേഖകളിൽ ഒപ്പിട്ടുകൊണ്ടിരിക്കുന്നതിനിടയിൽ, തൊട്ടടുത്തുണ്ടായിരുന്ന പൊലീസുകാരൻ നോക്കിനിൽക്കെ പ്രതി ഡോക്ടറെ അടിക്കുകയായിരുന്നു. ഉടൻതന്നെ പൊലീസുകാരൻ പ്രതിയെ പിടികൂടി മുറിക്ക് പുറത്തേക്ക് വലിച്ചുകൊണ്ടുപോകുന്നതും ദൃശ്യങ്ങളിൽ വ്യക്തമാണ്.
സ്ത്രീയെ ബ്ലേഡ് കൊണ്ട് ആക്രമിച്ച കേസിലെ പ്രതിയാണ് ഇയാളെന്ന് വാർധ ജില്ലാ ഹെൽത്ത് ഓഫീസർ സ്വപ്നിൽ ബെലെ വ്യക്തമാക്കി. എന്നാൽ ഡോക്ടറെ ആക്രമിക്കാനുണ്ടായ കാരണം എന്താണെന്ന് വ്യക്തമല്ല. സംഭവത്തിന് പിന്നാലെ ആരോഗ്യപ്രവർത്തകർ പ്രതിഷേധവുമായി രംഗത്തെത്തി. ഡോക്ടർമാരുടെ സംഘടനയുടെ നേതൃത്വത്തിൽ ചെറിയൊരു പണിമുടക്ക് സമരവും നടന്നു.
പ്രതിയെ ഉടൻതന്നെ പൊലീസ് അറസ്റ്റ് ചെയ്യുകയും ഭാരതീയ ന്യായ സംഹിത, മഹാരാഷ്ട്രയിലെ ആരോഗ്യപ്രവർത്തകർക്കെതിരെയുള്ള അതിക്രമങ്ങൾ തടയുന്ന നിയമം എന്നിവ പ്രകാരം കേസെടുക്കുകയും ചെയ്തു. ഡ്യൂട്ടിക്കിടെയുള്ള ഡോക്ടർമാരുടെയും മറ്റ് മെഡിക്കൽ സ്റ്റാഫുകളുടെയും സുരക്ഷയെക്കുറിച്ച് ഈ സംഭവം വീണ്ടും ഗൗരവമായ ആശങ്കകൾ ഉയർത്തിയിട്ടുണ്ട്.
