മൈസൂരു ദെസറ ആഘോഷങ്ങളുടെ ഭാഗമായി നടന്ന ഡ്രോൺ പ്രകടനത്തിന് ഗിന്നസ് റിക്കാർഡ്. ഒക്ടോബർ 18ന് ബന്നിമണ്ഡപത്തെ ടോർച്ച്‌ലൈറ്റ് പരേഡ് ഗ്രൗണ്ടിൽ ആകാശത്ത് 3,473 ഡ്രോണുകൾ ഒരേസമയം അണിനിരന്ന് തീർത്ത കൂറ്റൻ നൃത്തം ചെയ്യുന്ന മയിലിന്‍റെ രൂപമാണ് ഗിന്നസ് റിക്കാർഡിൽ ഇടംനേടിയത്. ഡ്രോണുകൾ ഉപയോഗിച്ച് പക്ഷികളുടെ ഏറ്റവും വലിയ ആകാശ ദൃശ്യം തീർത്തതിനാണ് ഈ നേട്ടം.
ചാമുണ്ഡേശ്വരി ഇലക്ട്രിസിറ്റി സപ്ലൈ കോർപ്പറേഷൻ ലിമിറ്റഡ് ആണ് ദെസറ ആഘോഷങ്ങളുടെ ഭാഗമായി ഈ വിസ്മയകരമായ ഡ്രോൺ ഷോ സംഘടിപ്പിച്ചത്. ഐഐടി ഡെൽഹിയുടെ ഇൻകുബേറ്റഡ് കമ്പനിയായ ‘ബോട്ട്‌ലാബ് ഡൈനാമിക്സ്’ ആണ് ഈ ദൃശ്യാവിഷ്കാരം ഒരുക്കിയത്. ആകാശത്ത് ചിറകുവിരിച്ച് നൃത്തം ചെയ്യുന്ന രീതിയിലുള്ള മയിലിന്‍റെ ദൃശ്യം കാണികളിൽ വലിയ കൗതുകമുണർത്തി.
മയിൽ രൂപത്തിന് പുറമെ ചിത്രശലഭം, സിംഹം, ചക്രം, ശ്രീരാമൻ തുടങ്ങി നിരവധി ദൃശ്യങ്ങളും ഈ ഡ്രോൺ ഷോയിൽ അവതരിപ്പിച്ചിരുന്നു. പാരമ്പര്യവും ആധുനിക സാങ്കേതികവിദ്യയും ഒത്തുചേരുന്നതിന്റെ ഉത്തമ ഉദാഹരണമാണ് മൈസൂരു ദെസറയെന്ന് കർണാടക ഉപമുഖ്യമന്ത്രി ഡി.കെ. ശിവകുമാർ എക്സ് പോസ്റ്റിലൂടെ വ്യക്തമാക്കി.
കർണാടകയുടെ സംസ്കാരത്തിന്‍റെയും സർഗാത്മകതയുടെയും പ്രതീകമാണ് ഈ നേട്ടമെന്നും അദ്ദേഹം അഭിപ്രായപ്പെട്ടു. സാമൂഹിക മാധ്യമങ്ങളിലും നിരവധി പേരാണ് ദൃശ്യങ്ങൾ പങ്കുവെച്ചും അഭിനന്ദനങ്ങൾ അറിയിച്ചും രംഗത്തെത്തിയത്.
