പുതിയ കാർ സ്വന്തമാക്കിയതിന്‍റെ സന്തോഷത്തിൽ ഷോറൂമിൽ നിന്ന് പുറത്തിറങ്ങിയ വാഹനത്തിന്‍റെ നിയന്ത്രണം നഷ്ടപ്പെട്ട് രണ്ട് പേർക്ക് ഗുരുതര പരിക്ക്. കർണാടകയിലെ സാഗർ ടൗണിലാണ് നാടകീയമായ സംഭവങ്ങൾ അരങ്ങേറിയത്. പുതുതായി വാങ്ങിയ കാറുമായി ഷോറൂമിന് പുറത്തേക്ക് ഇറങ്ങിയ ഉടൻ വാഹനം നിയന്ത്രണം വിടുകയും റോഡിലൂടെ പോകുകയായിരുന്ന ബൈക്കിലേക്ക് ഇടിച്ചുകയറുകയുമായിരുന്നു.
മാരുതി ഷോറൂമിന് സമീപത്താണ് അപകടം നടന്നത്. കാറോടിച്ച ഉപഭോക്താവിന് വാഹനത്തിന്‍റെ നിയന്ത്രണം പൂർണമായും നഷ്ടപ്പെടുകയായിരുന്നു. റോഡരികിലെ ഗാർഡ് റെയിൽ തകർത്താണ് കാർ ബൈക്കിലിടിച്ചത്. അപകടത്തിന്‍റെ ആഘാതത്തിൽ ബൈക്ക് യാത്രികനും പിന്നിലിരുന്നയാളും റോഡിലേക്ക് തെറിച്ചുവീഴുകയും ഗുരുതരമായി പരിക്കേൽക്കുകയും ചെയ്തു. സംഭവത്തെ തുടർന്ന് പ്രദേശത്ത് വലിയ പരിഭ്രാന്തിയാണ് ഉണ്ടായത്.
അപകടത്തിന്‍റെ സിസിടിവി ദൃശ്യങ്ങൾ പുറത്തുവന്നിട്ടുണ്ട്. കാർ നിയന്ത്രണം വിട്ട് ബൈക്കിലേക്ക് പാഞ്ഞുകയറുന്ന ദൃശ്യങ്ങൾ ഇതിൽ വ്യക്തമാണ്. ഡ്രൈവർക്ക് എങ്ങനെയുമാണ് നിയന്ത്രണം നഷ്ടപ്പെട്ടതെന്ന കാര്യം ഇതുവരെ വ്യക്തമായിട്ടില്ല. പരിക്കേറ്റവരുടെ പേരുവിവരങ്ങളും പ്രായവും ഏത് ആശുപത്രിയിലാണ് പ്രവേശിപ്പിച്ചിരിക്കുന്നത് എന്നതു സംബന്ധിച്ച വിവരങ്ങളും പോലീസ് പുറത്തുവിട്ടിട്ടില്ല.
സാഗർ പോലീസ് സംഭവത്തിൽ കേസെടുത്ത് അന്വേഷണം ആരംഭിച്ചിട്ടുണ്ട്. അപകടത്തിനുള്ള യഥാർഥ കാരണം കണ്ടെത്താനുള്ള ശ്രമത്തിലാണ് പോലീസ് ഉദ്യോഗസ്ഥർ.
