ആലപ്പുഴ: വസ്തുതർക്കത്തെത്തുടർന്ന് ഭാര്യാസഹോദരനെ കൊലപ്പെടുത്താൻ ശ്രമിച്ച പ്രതിക്ക് നാലുവർഷം കഠിനതടവും 25,000 രൂപ പിഴയും ശിക്ഷ വിധിച്ചു. കുത്തിയതോട് പോലീസ് രജിസ്റ്റർ ചെയ്ത കേസിലാണ് അഡീഷണൽ ജില്ലാ സെഷൻസ് കോടതി ജഡ്ജ് എച്ച്. ഷുഹൈബ് ശിക്ഷ വിധിച്ചത്.
പ്രതി എഴുപുന്ന സൗത്തിൽ കൂവക്കാട് തറവീട്ടിൽ സോമൻ (42) ആണ് ശിക്ഷിക്കപ്പെട്ടത്. പ്രതി സോമൻ ഭാര്യയുടെ സഹോദരൻ കൂവക്കാട് തറവീട്ടിൽ ശശിയെ വെട്ടരിവാൾ കൊണ്ട് ഇടതു പെടലിക്കും കവിളിലും വെട്ടി പരിക്കേൽപ്പിക്കുകയായിരുന്നു.
2020 ജൂൺ 27ന് രാത്രി ഒന്പതിനായിരുന്നു സംഭവം. കുത്തിയതോട് പോലീസ് ഇൻസ്പെക്ടർ എ.വി. ബിജു അന്വേഷണത്തിന് നേതൃത്വം നൽകി. അഡീഷണൽ പബ്ലിക് പ്രോസിക്യൂട്ടർ എൻ. ബി. ശാരി ഹാജരായി.
