ദുബായി: ഇടവേളയ്ക്കു ശേഷം ഇന്ത്യയുടെ ട്വന്റി-20 ക്രിക്കറ്റ് ടീം ക്യാപ്റ്റൻ സൂര്യകുമാർ യാദവ് ബാറ്റർമാരുടെ ലോക റാങ്കിംഗിൽ ആദ്യ പത്തിനുള്ളിൽ ഇടംപിടിച്ചു. മുൻ ഒന്നാം നന്പറായിരുന്ന സൂര്യകുമാർ അഞ്ച് സ്ഥാനങ്ങൾ മുന്നേറി പുതിയ പട്ടിക പ്രകാരം ഏഴാം സ്ഥാനത്തെത്തി.
ന്യൂസിലൻഡിനെതിരേ നടക്കുന്ന പരന്പരയിലെ ആദ്യ മൂന്നു മത്സരത്തിലെ മിന്നും ഫോമാണ് താരത്തിന് പട്ടികയിൽ മുന്നേറ്റമുണ്ടാക്കിയത്. ഫോമില്ലായ്മയുടെ പേരിൽ വിമർശനം ഏറ്റുവാങ്ങവേയാണ് സൂര്യ തകർപ്പൻ പ്രകടനത്തോടെ തിരിച്ചുവരവ് നടത്തിയതെന്നതാണ് ശ്രദ്ധേയം.
2026 ഐസിസി ട്വന്റി-20 ലോകകപ്പിന് ഒന്പത് ദിവസം മാത്രം ശേഷിക്കെ അഭിഷേക് ശർമ ഒന്നാം സ്ഥാനത്തും തിലക് വർമ മൂന്നാം സ്ഥാനത്തും തുടരുന്നത് ഇന്ത്യക്ക് ആത്മവിശ്വാസം നൽകും. റായ്പുരിൽ നടന്ന രണ്ടാം മത്സരത്തിൽ 32 പന്തിൽ നിന്ന് 76 റണ്സ് നേടിയ ഇഷാൻ കിഷൻ 64-ാം സ്ഥാനത്തും ശിവം ദുബെ ഒന്പത് സ്ഥാനങ്ങൾ മുന്നേറി 58-ാം സ്ഥാനത്തും റിങ്കു സിംഗ് 13 സ്ഥാനങ്ങൾ കയറി 68-ാം സ്ഥാനത്തും എത്തി. ഹാർദിക് പാണ്ഡ്യ ഓൾ റൗണ്ടർമാരിൽ മൂന്നാം സ്ഥാനത്തുണ്ട്.
