ഇന്ത്യയ്ക്കു പിന്നാലെ യുഎസും ടിക് ടോക്ക് നിരോധിക്കുമെന്ന് ഭീഷണി മുഴക്കിയതോടെ സമൂല മാറ്റത്തിനൊരുങ്ങി കമ്പനി.
ചൈനക്ക് പുറത്തേക്ക് ഹെഡ്ക്വാര്‍ട്ടേഴ്സ് മാറ്റാനും പുതിയ മാനേജ്മെന്റ് ബോര്‍ഡ് സൃഷ്ടിക്കാനുമാണ് ടിക് ടോക്കിന്റെ ഉടമകളായ ബൈറ്റ് ഡാന്‍സ് ലിമിറ്റഡ് ശ്രമിക്കുന്നതെന്ന് ദേശീയമാധ്യമങ്ങള്‍ റിപ്പോര്‍ട്ട് ചെയ്തു.
നിലവില്‍ ബൈറ്റ്ഡാന്‍സിന് ഉപരിയായി ടിക് ടോക്കിന് പ്രത്യേക ഹെഡ് ക്വാര്‍ട്ടേഴ്സ് ഇല്ല. ചൈന കേന്ദ്രീകരിച്ചാണ് ബൈറ്റ് ഡാന്‍സ് പ്രവര്‍ത്തിക്കുന്നത്.
എന്നാല്‍ ചൈനീസ് ബന്ധം തിരിച്ചടിയാവുമെന്ന് വ്യക്തമായതോടെ വിവിധ രാജ്യങ്ങളില്‍ ഓഫീസ് സ്ഥാപിച്ചു പ്രവര്‍ത്തിപ്പിക്കാനാണ് ടിക് ടോക്കിന്റെ പദ്ധതി.
പേരു വെളിപ്പെടുത്താത്ത ടിക് ടോക് ഉദ്യോഗസ്ഥനെ ഉദ്ധരിച്ചാണ് മാധ്യമങ്ങള്‍ ഇക്കാര്യം റിപ്പോര്‍ട്ട് ചെയ്തത്. ലോസ് ആഞ്ചല്‍സ്, ന്യൂയോര്‍ക്ക്, ലണ്ടന്‍, ഡുബ്ലിന്‍, സിംഗപ്പൂര്‍ എന്നിവിടങ്ങളില്‍ ഓഫീസ് തുറക്കാനാണ് ആലോചന. നേരത്തെ വാള്‍സ്ട്രീറ്റ് ജേണലും ഇക്കാര്യം റിപ്പോര്‍ട്ട് ചെയ്തിരുന്നു.
ഉപയോക്താക്കളുടെയും ജീവനക്കാരുടെയും നിര്‍മാതാക്കളുടെയും താല്‍പര്യം മാനിച്ചാണ് പ്രവര്‍ത്തന രീതിയില്‍ മാറ്റം വരുത്തുന്നതെന്നും മാധ്യമങ്ങള്‍ റിപ്പോര്‍ട്ട് ചെയ്തു.
ഇന്ത്യയില്‍ നിയന്ത്രണമേര്‍പ്പെടുത്തിയതോടെ 30 ശതമാനം ഉപയോക്താക്കളെയാണ് ടിക് ടോക്കിന് നഷ്ടമായത്. ടിക് ടോക്കിന്റെ മാതൃ സംഘടനയായ ബൈറ്റ് ഡാന്‍സ് നിലവില്‍ അമേരിക്കയില്‍ അന്വേഷണം നേരിടുന്ന കമ്പനിയാണ്.
കുട്ടികളുടെ സ്വകാര്യവിവരങ്ങള്‍ അവരുടെ മാതാപിതാക്കളുടെ അനുമതിയില്ലാതെ ടിക് ടോക് ചോര്‍ത്തുന്നുവെന്ന് അമേരിക്കന്‍ ഫെഡറല്‍ ട്രേഡ് കമ്മീഷന്‍ ആരോപിച്ചിരുന്നു. എന്നാല്‍ ഇക്കാര്യം ടിക് ടോക് നിഷേധിച്ചു.
ലോകത്താകമാനം 200 കോടി ആളുകളാണ് ടിക് ടോക് ഡൗണ്‍ലോഡ് ചെയ്തിരിക്കുന്നത്. എന്തായാലും ഇന്ത്യ കൊടുത്ത പണി ടിക് ടോക്കിന് വലിയ ക്ഷീണം ചെയ്തുവെന്ന കാര്യത്തില്‍ രണ്ടഭിപ്രായമില്ല.
