സി.സി.സോമൻ
കോട്ടയം: പോലീസ് വകുപ്പിൽ ജില്ലയിൽ ഇനി രണ്ട് എസ്പിമാർ. ലോ ആൻഡ് ഓർഡർ വിഭാഗത്തിനുള്ള എസ്പിക്ക് പുറമെ അഡ്മിനിസ്ട്രേഷൻ (ഭരണ) വിഭാഗത്തിനും എസ്പിമാരെ നിയമിച്ചു സർക്കാർ ഉത്തരവായി. മുതിർന്ന ഡിവൈഎസ്പിമാർക്ക് പ്രമോഷൻ നല്കി അഡീഷണൽ എസ്പിമാരായാണ് നിയമനം നല്കിയിട്ടുള്ളത്. 17 പോലീസ് ജില്ലകളിൽ ഇതിൻ പ്രകാരം അഡീഷണൽ ജില്ലാ പോലീസ് സൂപ്രണ്ടുമാരെ നിയമിച്ചു.
നിലവിൽ നിയമ പാലനത്തിന്‍റെയും ഭരണ വിഭാഗത്തിന്‍റെയും ചുമതല വഹിക്കുന്നത് ജില്ലാ പോലീസ് മേധാവികളാണ്. കേസ് അന്വേഷണത്തിനിടെ പോലീസിലെ ഭാരിച്ച ഭരണ കാര്യങ്ങൾകൂടി നോക്കാൻ ബുദ്ധിമുട്ട് നേരിടുന്നുണ്ട്. പോലീസുകാരുടെ ശന്പളം, കെട്ടിട നിർമാണം, വാഹനം വാങ്ങൽ , പെൻഷൻ തുടങ്ങിയ ഒട്ടേറെ ഭരണ കാര്യങ്ങൾ നിർവഹിക്കാനുണ്ട്.
ഇക്കാര്യം പരിഗണിച്ചാണ് ഭരണ കാര്യങ്ങൾക്ക് ജില്ലാ തലത്തിൽ എസ്പിമാരെ നിയമിക്കാൻ സർക്കാർ തീരുമാനിച്ചത്. ഇതോടെ നിയമ പാലനത്തിനും (ലോ ആൻഡ് ഓർഡർ) ഭരണ (അഡ്മിനിസ്ട്രേഷൻ) കാര്യങ്ങൾക്കും രണ്ടു പോലീസ് സൂപ്രണ്ടുമാരായി. ഇപ്പോൾ ഭരണ വിഭാഗത്തിന്‍റെ ചുമതല ഡിവൈഎസ്പിക്കാണ്.
പുതുതായി നിയമനം ലഭിച്ച ഭരണ വിഭാഗം അഡീഷണൽ എസ്പിമാർ. ബ്രാക്കറ്റിൽ നിയമനം ലഭിച്ച സ്ഥലം. എസ്. അനിൽകുമാർ (തൃശൂർ സിറ്റി), പി.ബി. പ്രശോഭ് (കാസർഗോട്), പി.എ. മുഹമ്മദ് അരിഫ് (കൊല്ലം സിറ്റി), എ. ഷാനവാസ് (തിരുവനന്തപുരം റൂറൽ), എസ്. ദേവമനോഹർ (മലപ്പുറം), കെ. മുഹമ്മദ് ഷാഫി (കൊല്ലം റൂറൽ), ബി. കൃഷ്ണകുമാർ (സീനിയർ-ആലപ്പുഴ), എം. സുബൈർ (തൃശൂർ റൂറൽ), കെ. സലിം (പാലക്കാട്), ടി.കെ. സുബ്രഹ്മണ്യൻ (കോഴിക്കോട് റൂറൽ), എം.ജെ. സോജൻ (എറണാകുളം റൂറൽ), എ. നസിം (കോട്ടയം), കെ.കെ. മൊയ്ദീൻകുട്ടി (വയനാട്), എം.സി. ദേവസ്യ (കോഴിക്കോട് സിറ്റി), എം. ഇക്ബാൽ (ഇടുക്കി), എസ്.ആർ. ജ്യോതിഷ്കുമാർ (പത്തനംതിട്ട), വി.ഡി. വിജയൻ (കണ്ണൂർ).
