ഇഷ്ടപ്പെട്ട ആളുകൾക്ക് എന്തെങ്കിലുമൊക്കെ സമ്മാനം കൊടുക്കാൻ ആഗ്രഹില്ലാത്ത ആളുകൾ ചുരുക്കമാണ്. തന്റെ പ്രിയപ്പെട്ട സഹപാഠികൾക്ക് എട്ട് വയസുകാരൻ ഒരു സമ്മാനം നൽകി. എല്ലാവർക്കും തുല്യമായാണ് സമ്മാനം കൊടുത്തത്. സമ്മാനക്കഥയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. കിഴക്കന് ചൈനയിലാണ് സംഭവം.
അവൻ തന്റെ അമ്മയുടെ സ്വർണമാലയാണ് കൂട്ടുകാർക്ക് സമ്മാനമായി നൽകിയത്. കൂട്ടത്തിൽ ആർക്കും സങ്കടം വരാതിരിക്കാൻ എല്ലാവർക്കും മാല തുല്യ അളവിൽ മുറിച്ചാണ് കൊടുത്തത്. എന്നാൽ വീട്ടുകാർക്ക് ഇതിനെക്കുറിച്ച് യാതൊരു അറിവും ഉണ്ടായിരുന്നില്ല.
കൂട്ടുകാരൻമാരിലൊരാൾ തന്റെ ചേച്ചിയോട് വിലയേറിയ സമ്മാനം ലഭിച്ച കാര്യം പറയുമ്പോഴാണ് കാര്യം പുറത്തറിയുന്നത്. അവന്റെ സുഹൃത്ത് അവന് സ്വർണമാല കൊടുത്തെന്ന് വെളിപ്പെടുത്തിയതോടെ ചേച്ചി മാതാപിതാക്കളെ വിവരം അറിയിച്ചു. ഇതറിഞ്ഞ അവർ കുട്ടിയുടെ വീട്ടുകാരോട് കാര്യം പറഞ്ഞു.
വിവരം അറിഞ്ഞ് അച്ഛന്റെ കൈയിൽ നിന്നും കുട്ടിക്ക് അടി കിട്ടി. ആദ്യം ദേഷ്യം തോന്നിയെങ്കിലും പിന്നീട് തനിക്ക് അതൊരു തമാശയായി തോന്നിയെന്ന് കുട്ടിയുടെ അമ്മ പറഞ്ഞു.
