ചമ്പക്കുളം: ചാണ്ടി ഉമ്മനോടൊപ്പം നാലു പഞ്ചായത്ത് പ്രദേശങ്ങളിൽ സൈക്കിൾ പര്യടനം നടത്തി വേറിട്ട പ്രചാരണവുമായി കുട്ടനാട്ടിലെ യുഡിഎഫ് സ്ഥാനാർഥി റെജി ചെറിയാൻ. മുൻ ജനകീയ മുഖ്യമന്ത്രി ഉമ്മൻ ചാണ്ടിയുടെ മകനും പുതുപ്പള്ളി എംഎൽഎയുമായ ചാണ്ടി ഉമ്മനോടൊപ്പമാണ് അമ്പലപ്പുഴ-തിരുവല്ല സംസ്ഥാന പാതയിൽ തകഴി പഞ്ചായത്തിൽ ഉൾപ്പെട്ട പച്ച ജംഗ്ഷനിൽനിന്നും ആരംഭിച്ച സൈക്കിൾ യാത്ര എടത്വ, തലവടി പഞ്ചായത്തുകളിലൂടെ മുട്ടാർ പഞ്ചായത്തിലെ മുട്ടാർ ജംഗ്ഷനിൽ അവസാനിച്ചത്.
കുട്ടനാടിന്റെ ഭാവിയെപ്പറ്റിയുള്ള കാഴ്ചപ്പാടിൽ മാത്രമല്ല പ്രചാരണത്തിലും വേറിട്ട വഴിയിലൂടെയാണ് കുട്ടനാട്ടിലെ യുഡിഎഫ് സ്ഥാനാർഥിയുടെ പ്രചാരണം. ചാണ്ടി ഉമ്മനോടൊപ്പം ടീ ഷർട്ടും പാന്റും ധരിച്ച് സൈക്കിളിൽ സ്ഥാനാർഥി പര്യടനം നടത്തിയത് കുട്ടനാട്ടുകാർക്ക് ഒരു പുതിയ അനുഭവമായിരുന്നു.
പുതുപ്പള്ളിയിലെ തെരഞ്ഞെടുപ്പ് പ്രചാരണ പ്രവർത്തനങ്ങൾക്കിടയിലും കുട്ടനാട്ടിൽ പ്രചാരണത്തിന് സമയം കണ്ടെത്തിയത് കുട്ടനാടിനോടുള്ള സ്നേഹവും അതോടൊപ്പം യുഡിഎഫ് സ്ഥാനാർഥിയുടെ വികസന കാഴ്ചപ്പാടുകളുമാണെന്നും ചാണ്ടി ഉമ്മൻ പറഞ്ഞു.
