കൊച്ചി: എളംകുളം മെട്രോ സ്റ്റേഷന് കെട്ടിടത്തില് കോണ്ക്രീറ്റ് പാളികള് അടര്ന്നു വീണ ഭാഗങ്ങളിലെ അറ്റകുറ്റപ്പണികള് ഉടന് ആരംഭിക്കുമെന്ന് കെഎംആര്.എല് അറിയിച്ചു.കോണ്ക്രീറ്റ് പാളികള് അടര്ന്നുവീണതിനെ തുടര്ന്ന് കെട്ടിടത്തിന്റെ നിര്മാതാക്കളായ ഡല്ഹി മെട്രോ റെയില് കോര്പ്പറേഷന് ടെക്നിക്കല് സംഘം വിശദ പരിശോധന നടത്തിയിരുന്നു.
ഡിഎംആര്സി നിര്ദേശപ്രകാരം, ആധുനിക നോണ് ഡിസ്ട്രക്ടീവ് ടെസ്റ്റിംഗ് രീതികള് ഉപയോഗിച്ച് സമഗ്രമായ സാങ്കേതിക പരിശോധനകള് നടത്തി. പരിശോധനാഫലങ്ങളുടെ അടിസ്ഥാനത്തില് സ്റ്റേഷന്റെ ഘടനാപരമായ സുരക്ഷയ്ക്ക് യാതൊരു ഭീഷണിയും ഇല്ലെന്നും, സ്റ്റേഷന് സുരക്ഷിതമാണെന്നും ഡിഎംആര്സി സ്ഥിരീകരിക്കുകയും ചെയ്തിരുന്നു.
എന്നിരുന്നാലും, കോണ്ക്രീറ്റ് അടര്ന്നു വീണ ചില ഭാഗങ്ങളില് അറ്റകുറ്റപ്പണികളും ശക്തിപ്പെടുത്തലും ആവശ്യമാണ് എന്ന് വിദഗ്ധ സംഘം നിര്ദേശിച്ചു. ഇതിന്റെ അടിസ്ഥാനത്തില് അറ്റകുറ്റപ്പണികള്ക്ക് ആവശ്യമായ വിശദമായ മെതഡോളജിയും രൂപരേഖയും തയാറാക്കിയിട്ടുണ്ട്.
ഈ പ്രവൃത്തികളുടെ നിര്വഹണത്തിനായി ടെണ്ടര് ക്ഷണിക്കുകയും, ടെണ്ടര് നടപടികള് നിലവില് പൂര്ത്തിയാക്കുകയും ചെയ്തിട്ടുണ്ട്.അറ്റകുറ്റപ്പണികള് അടുത്താഴ്ച ആരംഭിക്കുമെന്നും, കഴിയുന്നത്ര വേഗം പൂര്ത്തിയാക്കാനാകുമെന്നുമാണ് പ്രതീക്ഷിക്കുന്നതെന്നും കെഎംആര്എല് അറിയിച്ചു.
