വിദേശത്ത് താമസിക്കുന്നതിന്റെ യഥാർഥ വില പണമല്ല, മറിച്ച് കുടുംബത്തോടൊപ്പമുള്ള പ്രധാന നിമിഷങ്ങൾ നഷ്ടപ്പെടുത്തുന്നതാണെന്ന് തുറന്നുപറഞ്ഞ ഒരു ഇന്ത്യൻ യുവതിയുടെ വീഡിയോ സോഷ്യൽ മീഡിയയിൽ വൈറലായിരിക്കുകയാണ്.
അയർലൻഡിലെ ഡബ്ലിനിൽ താമസിക്കുന്ന പ്രാചി ദുസാദ് എന്ന യുവതിയാണ് ഈ വീഡിയോ പങ്കുവെച്ചത്.ഇന്ത്യയിൽ നടന്ന തന്റെ കസിന്റെ വിവാഹത്തിൽ പങ്കെടുക്കാൻ സാധിക്കാതെ വന്നതിനെത്തുടർന്നാണ് പ്രാചി തന്റെ വികാരം പ്രകടിപ്പിച്ചത്. നാട്ടിലെ ആഘോഷങ്ങളുടെ ചിത്രങ്ങളും വീഡിയോകളും കാണുമ്പോൾ തനിക്ക് വലിയ വിഷമം തോന്നുന്നുവെന്ന് അവർ വീഡിയോയിൽ പറയുന്നു.
വിദേശത്തെ ജീവിതച്ചെലവിനെക്കുറിച്ച് ആളുകൾ ചോദിക്കുമ്പോൾ സാധാരണയായി വാടകയെക്കുറിച്ചും പലചരക്ക് സാധനങ്ങളെക്കുറിച്ചുമൊക്കെയാണ് സംസാരിക്കാറുള്ളത്. എന്നാൽ യഥാർത്ഥ ചിലവ് പണമല്ലെന്നും, ടിക്കറ്റ് എടുക്കാൻ സാമ്പത്തിക ശേഷിയുണ്ടായിട്ടും ജോലിപരമായ ഉത്തരവാദിത്തങ്ങളും വിദേശത്തെ ജീവിത സാഹചര്യങ്ങളും കാരണം ഇത്തരത്തിലുള്ള വിശേഷാവസരങ്ങൾ നഷ്ടപ്പെടുന്നതാണ് യഥാർത്ഥ വിലയെന്നും അവർ വ്യക്തമാക്കി.
ഇൻസ്റ്റാഗ്രാമിലൂടെ പങ്കുവെച്ച ഈ വീഡിയോ പ്രവാസികളായ നിരവധിയാളുകളുടെ ഇടയിൽ വലിയ ചർച്ചകൾക്ക് വഴിയൊരുക്കി. തങ്ങളും സമാനമായ സാഹചര്യങ്ങളിലൂടെയാണ് കടന്നുപോകുന്നതെന്ന് പലരും കമന്റുകളിലൂടെ പ്രതികരിച്ചു. വിദേശത്ത് മികച്ച ജീവിതം കെട്ടിപ്പടുക്കാൻ ശ്രമിക്കുമ്പോൾ പ്രവാസികൾ നൽകേണ്ടി വരുന്ന വൈകാരികമായ ത്യാഗങ്ങളെയാണ് പ്രാചിയുടെ വീഡിയോ ഓർമ്മിപ്പിക്കുന്നത്.
