കൊച്ചി: മുണ്ടംവേലി ലൈഫ് മിഷന്‍ ഫ്‌ലാറ്റിലെ കുടുംബങ്ങളുടെ പുനരധിവാസം വെല്ലുവിളിയാകുന്നു. ഫ്‌ലാറ്റ് നിവാസികളുടെ സമരം 70 ദിവസം പിന്നിട്ടിട്ടും പുനരധിവാസത്തെ കുറിച്ച് തീരുമാനമായില്ല. 78 കുടുംബങ്ങളെയാണ് മാറ്റി പാര്‍പ്പിക്കേണ്ടത്. എന്നാല്‍ പുനരധിവസിപ്പിക്കാനുള്ള സ്ഥലം കണ്ടെത്താനുള്ള നീക്കത്തിലാണ് തദ്ദേശവകുപ്പ്
നിര്‍മാണം പൂര്‍ത്തിയായ തുരുത്തി ഫ്‌ലാറ്റിലേക്ക് മാറ്റി താമസിപ്പിക്കാനുള്ള കലക്ടറുടെ നിര്‍ദേശം കോര്‍പറേഷന്‍ തള്ളി. മുഴുവന്‍ ആളുകള്‍ക്കും പട്ടയം നല്‍കി പുനരധിവസിപ്പിക്കണമെന്നാണ് മുണ്ടംവേലി ഫ്‌ലാറ്റ് നിവാസികളുടെ ആവശ്യം.
അതേസമയം, ഫ്‌ലാറ്റ് നിര്‍മാണവുമായി ബന്ധപ്പെട്ട് കരാര്‍ ഏജന്‍സിക്ക് മൊബിലൈസേഷന്‍ അഡ്വാന്‍സ് നല്‍കിയത് ലൈഫ് മിഷന്റെ സ്ഥിരീകരണം ഇല്ലാതെയാണെന്ന് തെളിയിക്കുന്ന രേഖകള്‍ പുറത്തുവന്നു. മുന്‍ ചെയര്‍മാന്‍ വി. സലിം ജിസിഡിഎ ഓഡിറ്റിംഗ് വിഭാഗത്തിന് പരിശോധനയ്ക്ക് സമയം അനുവദിക്കാതെ പണം നല്‍കാന്‍ ആവശ്യപ്പെടുകയായിരുന്നു.
ഓണ്‍ലൈന്‍ പെയ്‌മെന്റിന് പകരം ചെക്കായാണ് 2.49 കോടി രൂപ അനുവദിച്ചതെന്ന് വെളിപ്പെടുത്തുന്ന ജിസിഡിഎ നോട്ട് ഷീറ്റിന്റെ പകര്‍പ്പാണ് പുറത്ത് വന്നത്. മുണ്ടംവേലി ഫ്‌ലാറ്റ് സമുച്ചയത്തിന്റെ കരാറുകാരായ തൃശൂര്‍ ഡിസ്ട്രിക്ട് ലേബര്‍ കോ-ഓപ്പറേറ്റീവ് സൊസൈറ്റിക്ക് അഡ്വാന്‍സ് മൊബിലൈസേഷന്‍ ഫണ്ട് നല്‍കാന്‍ 2020 സെപ്റ്റംബര്‍ 30നാണ് ടിഡിഎല്‍സിക്ക് 20 ശതമാനം മൊബിലൈസേഷന്‍ ഫണ്ട് നല്‍കാന്‍ സര്‍ക്കാര്‍ ഉത്തരവിറങ്ങുന്നത്.
സാങ്കേതിക ഭരണ അനുമതി ലൈഫ് മിഷന്‍ പരിശോധിച്ചു അംഗീകാരം നല്‍കിയശേഷം ഫണ്ട് നല്‍കാവൂ എന്നും ഉത്തരവില്‍ പറയുന്നു. ഈ വിവരം ജിസിഡിഎ നോട്ട് ഷീറ്റില്‍ എഴുതിയിട്ടുണ്ട്. എന്നാല്‍ ലൈഫ് മിഷന്റെ ഈ അനുമതി ലഭിക്കുന്നതിന് മുമ്പ് തന്നെ 2.49 കോടി രൂപ നല്‍കിയതായാണ് രേഖയിലുള്ളത്.
എന്നാല്‍, പണം കൈമാറിയത് ചട്ടങ്ങളും നിര്‍ദേശങ്ങളും പാലിച്ച് സുതാര്യമായായിരുന്നെന്നും മൊബിലൈസേഷന്‍ അഡ്വാന്‍സ് നല്‍കുക എന്നത് കരാര്‍ വ്യവസ്ഥയില്‍ ഉള്ളതാണെന്നും ജിസിഡിഎ വ്യക്തമാക്കി. ഫ്‌ലാറ്റ് വിഷയത്തില്‍ മുമ്പ് നടന്ന രണ്ട് വിജിലന്‍സ് അന്വേഷണത്തിലും തുക കൈമാറിയതില്‍ ചട്ടവിരുദ്ധതയോ നിയമലംഘനമോ കണ്ടെത്തിയിട്ടില്ല. പുതിയ അന്വേഷണത്തിലും ഇക്കാര്യങ്ങളൊക്കെ പരിശോധിക്കട്ടെയെന്നും ജിസിഡിഎ വൃത്തങ്ങള്‍ പറഞ്ഞു.
