മേപ്പാടി: പുത്തുമല എസ്റ്റേറ്റിൽ കടുവയുടെ സാന്നിധ്യമുണ്ടെന്ന സംശയം ശക്തമാകുന്നു. വ്യാഴാഴ്ച വൈകുന്നേരം എസ്റ്റേറ്റിൽ പശുവിനെ കൊന്നത് കടുവയാണെന്നാണ് നാട്ടുകാർ സംശയിക്കുന്നത്. എന്നാൽ, വനംവകുപ്പ് ഉദ്യോഗസ്ഥർ നടത്തിയ പരിശോധനയിൽ പശുവിനെ കൊന്നത് പുലിയാണെന്നായിരുന്നു പ്രാഥമിക നിഗമനം.
എന്നാൽ സംഭവത്തിന് പിന്നാലെ പശുവിന്‍റെ ജഡം അപ്രത്യക്ഷമായതോടെയാണ് പ്രദേശവാസികൾക്കിടയിൽ കടുവാഭീതി ഉയർന്നത്. ഇരയെ കൊന്നശേഷം ഭക്ഷിച്ച് ബാക്കി ശരീരഭാഗങ്ങൾ ഉപേക്ഷിക്കുന്നതാണ് പുലിയുടെ പതിവ്. എന്നാൽ ഇരയുടെ ജഡം പൂർണമായും കടിച്ചെടുത്ത് കൊണ്ടുപോകുന്നത് കടുവകളുടെ രീതിയാണെന്നാണ് നാട്ടുകാർ ചൂണ്ടിക്കാട്ടുന്നത്.
പശുവിനെ ആക്രമിച്ചത് കടുവയാണോ പുലിയാണോ എന്ന കാര്യത്തിൽ വ്യക്തത വരുത്തണമെന്നാണ് നാട്ടുകാരുടെ ആവശ്യം. ഏതായാലും എസ്റ്റേറ്റിൽ വന്യമൃഗത്തിന്റെ സാന്നിധ്യം ജനങ്ങളെ കടുത്ത ആശങ്കയിലാക്കിയിരിക്കുകയാണ്. പ്രദേശത്തെ ജനങ്ങളുടെ സുരക്ഷ ഉറപ്പാക്കാൻ അടിയന്തര നടപടി സ്വീകരിക്കണമെന്നും വന്യമൃഗത്തെ എത്രയും വേഗം കാട്ടിലേക്ക് തുരത്തണമെന്നുമാണ് നാട്ടുകാരുടെ ആവശ്യം.
