കള്ളവുമില്ല ചതിവുമില്ലന്നെള്ളോളമില്ല പൊളിവചനം! വരികളെ അന്വർഥമാക്കുന്ന സംഭവമാണ് കഴിഞ്ഞ ദിവസം കോട്ടയം നഗരത്തിലുണ്ടായത്. കേരളത്തിലെ ആളുകൾ എങ്ങനെയെന്നും സേഫ് ആണോ കേരളമെന്നുമൊക്കെ പരീക്ഷിക്കുന്നതിനായി അഫ്ഗാനിസ്ഥാൻ സ്വദേശിയായ മസൂദ് എന്ന വ്ലോഗർ നടത്തിയ സോഷ്യൽ എക്സ്പിരിമെന്‍റ് ശ്രദ്ധേയമാകുന്നു.
മസൂദിന് കേരളത്തിലെ ജീവിതരീതികളും ഭക്ഷണവും സംസ്കാരവും പരിചയപ്പെടുത്തുന്നൊരു ചാനലുണ്ട്. അഫ്ഗാനിസ്ഥാൻ സ്വദേശിയാണെങ്കിലും യുവാവ് പഠിക്കുന്നത് കേരളത്തിലാണ്. അതിനാൽത്തന്നെ കേരളത്തോട് പ്രത്യേക ഇഷ്ടമാണ് മസൂദിന്. കേരളത്തോടുള്ള പ്രത്യേക ഇഷ്ടത്തിന്‍റെ ഭാഗമായാണ് ഇവിടുത്തെ ജനങ്ങളുടെ പെരുമാറ്റം മനസിലാക്കാൻ വ്യത്യസ്തമായ പരീക്ഷണം നടത്തിയത്.
കോട്ടയം നഗരത്തിൽ ആകാശ പാതയുടെ അരികിലായി ഫൂട്ട്പാത്തിൽ മസൂദ് തന്‍റെ സ്കൂട്ടർ പാർക്ക് ചെയ്ത് സീറ്റിനു പുറത്തായി 500 രൂപയുടെ ഏതാനും നോട്ടുകളടങ്ങിയ പേഴ്സ്‌വച്ചു. വഴിയിൽക്കൂടി പോകുന്ന ഏതൊരുവനും ആ പേഴ്സ് കാണാൻ പാകത്തിനായിരുന്നു അത്. ആരെങ്കിലും അത് എടുക്കുമോ എന്ന് പരീക്ഷിക്കാനായിരുന്നു പേഴ്സ് മനപൂർവം അവിടെവച്ചത്. എന്നാൽ ആരുംതന്നെ അതൊന്നു നോക്കി നൽക്കുക പോലും ചെയ്യാതെ കണ്ടിട്ടും കാണാതെ നടിച്ച് അതുവഴി കടന്നുപോയി.
ഏകദേശം രാത്രി 7 മുതൽ 8വരെ മസൗദ് തന്‍റെ പേഴ്സ് ആരെങ്കിലും എടുക്കുമോ എന്ന് നോക്കിക്കൊണ്ട് നിന്നു. എന്നാൽ അതുവഴി പോയ ആരും തന്നെ ആ പേഴ്സ് ഒന്നു നോക്കുകപോലും ഉണ്ടായില്ല. അങ്ങിനെ കേരളത്തിന്‍റെ അഭിമാനം നമ്മള് മലയാളികള്‍ വീണ്ടും ഉയര്‍ത്തിപ്പിടിച്ചിരിക്കുന്നു എന്ന് വീഡിയോയിലൂടെ മനസിലാക്കാം.
വീഡിയോ വൈറലായതോടെ നിരവധി ആളുകളാണ് കമന്‍റുമായി എത്തിയത്. വീഡിയോ കാണുന്നയാള്‍ കമന്‍റ് ബോക്സില്‍ ഒന്ന് ചെല്ലാതെ തിരികെ പോകില്ല! കാരണം അവിടെയാണ് രസം! മലയാളി പൊളിയല്ലേ.. ആരും എടുക്കല്ലേ എന്ന് പ്രാർഥിച്ചാണിത് കണ്ടത്. നന്ദിയുണ്ടേ… എന്നു തുടങ്ങി ധാരാളം കമന്‍റുകളാണ് വീഡിയോയിൽ. മാത്രമല്ല, കമന്‍റ് വായിക്കാൻ വരുന്നവർക്ക് ഇരിക്കാനുള്ള കേസേരവരെ റെഡിയാക്കിയിട്ടുള്ള വില്ലൻമാരും കൂട്ടത്തിലുണ്ടായിരുന്നു.
കേരളത്തിലെ ജനങ്ങളുടെ സത്യസന്ധതയെക്കുറിച്ചുള്ള ചർച്ചകൾക്ക് വഴിയൊരുക്കിയിരിക്കുകയാണ് മസൂദിന്റെ ഈ സോഷ്യൽ എക്സ്പിരിമെന്‍റ്.
