മുംബൈ: മഹാരാഷ്ട്രയിലെ ഛത്രപതി സംഭാജിനഗറിൽ അഞ്ചും ഏഴും വയസുള്ള ആൺമക്കളെ പിതാവ് കനാലിലേക്ക് എറിഞ്ഞു. പൈത്തൺ പട്ടണത്തിൽ തിങ്കളാഴ്ച വൈകുന്നേരമാണ് സംഭവം.
ഏഴ് വയസുകാരനായ ആര്യൻ, അഞ്ച് വയസുകാരനായ ശ്യാം എന്നിവരെയാണ് പിതാവ് സോമനാഥ് ദാമോദർ റോഡ്ഗെ (40) കനാലിലേക്ക് എറിഞ്ഞത്. സംഭവത്തിൽ പ്രതിയെ പൊലീസ് അറസ്റ്റ് ചെയ്തു.
ചോക്ലേറ്റും വടാ പാവും വാങ്ങിനൽകാമെന്ന് പറഞ്ഞ് വിശ്വസിപ്പിച്ചാണ് സോമനാഥ് കുട്ടികളെ തന്റെസ്കൂട്ടറിൽ പുറത്തേക്ക് കൂട്ടിക്കൊണ്ടുപോയത്. കനാലിന് സമീപമെത്തിയ ശേഷം ഇയാൾ കുട്ടികളെ വെള്ളത്തിലേക്ക് എറിയാൻ ശ്രമിക്കുകയായിരുന്നു.
‘അച്ഛാ… ഞങ്ങൾ മരിച്ചുപോകും, ദയവായി ഇത് ചെയ്യരുത്’ എന്ന് കുട്ടികൾ കരഞ്ഞുകൊണ്ട് അപേക്ഷിച്ചെങ്കിലും, പിതാവ് ഇത് വകവെക്കാതെ അവരെ കനാലിലേക്ക് എറിയുകയായിരുന്നുവെന്നാണ് വിവരം.
ഇത് തടയാൻ ശ്രമിച്ച പ്രദേശത്തെ കർഷകർക്ക് നേരെ സോമനാഥ് കല്ലെറിയുകയും അസഭ്യം പറയുകയും ചെയ്തു.തുടർന്ന് കർഷകർ നൽകിയ വിവരത്തിന്റെ അടിസ്ഥാനത്തിൽ സ്ഥലത്തെത്തിയ പൊലീസ് പ്രതിയെ പിടികൂടുകയായിരുന്നു.
ചോദ്യം ചെയ്യലിൽ ഇയാൾ കുറ്റം സമ്മതിച്ചതായി പാച്ചോഡ് പൊലിസ് അറിയിച്ചു. അതേസമയം കനാലിൽ കാണാതായ കുട്ടികൾക്കായുള്ള തെരച്ചിൽ തുടരുകയാണ്.
