2026ലെ മിസ് സൗത്ത് ആഫ്രിക്ക സൗന്ദര്യമത്സരത്തിൽ ടിയാനി മകാമു കിരീടം ചൂടിയെങ്കിലും, വിജയിയെ അണിയിച്ച കിരീടത്തെച്ചൊല്ലിയാണ് സമൂഹമാധ്യമങ്ങളിൽ വിവാദം. സാധാരണയായി മത്സരത്തിൽ ഉപയോഗിക്കാറുള്ള പ്രൗഢഗംഭീരമായ കിരീടത്തിന് പകരം നൽകിയ കിരീടത്തിന് നിലവാരം കുറവാണെന്നാണ് പ്രേക്ഷകരുടെ പ്രധാന വിമർശനം. വിവാദം കടുത്തതോടെ, ഇത് താൽക്കാലിക കിരീടമാണെന്നും ഔദ്യോഗിക കിരീടം തയ്യാറായി വരുന്നതേയുള്ളൂവെന്നും മിസ് സൗത്ത് ആഫ്രിക്ക ഓർഗനൈസേഷൻ വിശദീകരിച്ചു.
കിരീടമണിഞ്ഞ ടിയാനി മകാമുവിന്റെ ചിത്രങ്ങൾ മിസ് സൗത്ത് ആഫ്രിക്കയുടെ ഔദ്യോഗിക ഇൻസ്റ്റാഗ്രാം പേജിൽ പങ്കുവെച്ചതിന് പിന്നാലെയാണ് വിമർശനങ്ങൾ ഉയർന്നത്. കിരീടം കാണാൻ പ്ലാസ്റ്റിക് പോലെയുണ്ടെന്നും വിലകുറഞ്ഞ രീതിയിലാണ് നിർമിച്ചിരിക്കുന്നതെന്നും നിരവധി പേർ അഭിപ്രായപ്പെട്ടു. സൗന്ദര്യമത്സരങ്ങളിലെ പരമ്പരാഗത കിരീടങ്ങളുടെ പ്രൗഢി ഇതിനില്ലെന്നും, കളിപ്പാട്ടം പോലുണ്ടെന്നുമൊക്കെയാണ് കമന്റുകൾ.
മിസ് സൗത്ത് ആഫ്രിക്കയുടെ ചരിത്രത്തിലെ തന്നെ ഏറ്റവും മോശം ലൈവ് ഷോ ആയിരുന്നു ഇതെന്ന് ഒരാൾ കുറിച്ചപ്പോൾ, ഹാരി പോട്ടർ, ഗെയിം ഓഫ് ത്രോൺസ് തുടങ്ങിയ സിനിമകളിലെയും സീരീസുകളിലെയും കിരീടങ്ങളോട് ഉപമിച്ചും ചിലർ പരിഹസിച്ചു. മുൻ വിജയി അണിഞ്ഞിരുന്ന പഴയ കിരീടം തന്നെ ഈ ചടങ്ങിലും ഉപയോഗിക്കാമായിരുന്നുവെന്നും ആരാധകർ അഭിപ്രായപ്പെട്ടു.
വിമർശനങ്ങൾ ശക്തമായതോടെ മിസ് സൗത്ത് ആഫ്രിക്ക ഓർഗനൈസേഷൻ ഔദ്യോഗിക പ്രസ്താവനയുമായി രംഗത്തെത്തി. ഫൈനലിൽ ഉപയോഗിച്ചത് താൽക്കാലികമായ ഒരു ആചാര കിരീടം മാത്രമാണെന്നും, പുതിയ ഔദ്യോഗിക കിരീടത്തിന്റെ നിർമാണ പ്രവർത്തനങ്ങൾ അവസാന ഘട്ടത്തിലാണെന്നും വ്യക്തമാക്കി.
നിലവിലെ മിസ് സൗത്ത് ആഫ്രിക്ക പ്രതിനിധീകരിക്കുന്ന ജനങ്ങളുടെ സ്വത്വവും മൂല്യങ്ങളും അഭിലാഷങ്ങളും പ്രതിഫലിപ്പിക്കുന്ന ഒന്നായിരിക്കണം പുതിയ കിരീടമെന്നും, അത് അനാച്ഛാദനം ചെയ്യുന്ന പ്രക്രിയയിൽ ദക്ഷിണാഫ്രിക്കൻ ജനതയെയും പങ്കാളികളാക്കാൻ ആഗ്രഹിക്കുന്നുവെന്നും സംഘാടകർ കൂട്ടിച്ചേർത്തു.
